銀行公會每兩個星期開一次大會，一眾傳媒已識得定時定候，去等銀公主席出嚟問吓嘢，銀行公會主席洪丕正（Benjamin）見大家咁辛苦，尋日特登叫外賣慰勞吓大家，其實銀公點止隔兩個星期開大會，今年差唔多日日都有會要開！
太子尋日聽Benjamin講，今年銀公有成35個委員會，總共有365個銀行代表開會，淨係計上半年，開會已經開咗128次，有32個要同監管機構或者政府開，扣番星期六、日同公眾假期，仲唔係日日開會？
重建信心最大挑戰
雖然銀公手頭工作量咁大，件件都好重要，但係講到最大挑戰，Benjamin話，始終都係重建社會對銀行信心，果然任重道遠。