本文重點
港股上周走勢轉弱，若然恒指呢轉只係調整，21,000至21,500點支持區不容有失。展望本周期指結算，跟住又到傳統「五窮六絕」嘅時候。不過，阿莊總覺得，呢個世界冇一本通書可以睇到老。下月中美兩國經濟峰會，人民幣升值幾成定論，而四月份股市表現已消化打擊樓市炒風措施及季內央行可能加息嘅因素，故對後市表現亦毋須過於悲觀。
上周五阿莊持倉嘅中芯國際（00981）有異動，股價以全日高位0.93元收市，升10.7%，成交2.73億元。公司將於今日宣布業績，如無意外，將會手起刀落將陳舊壞帳一一撇清，如此則大可以一隻新股來看待，以其來自兩岸嘅股東陣容，以及新管理班子嘅能耐，可繼續捧場。此外，注意持倉中嘅中國人壽（02628），末期息每股0.7元人民幣將於本周五除淨。
游資集中炒國策股
內房股可以繼續當透明，內銀股又受集資陰霾籠罩，游資選擇唔多，繼續停留喺國策股，如醫改、3G、內需、環保新能源等股份。隨着內地經濟持續發展，淨水需求不斷上升，水務股前景看俏。北控水務（00371）上周股價重拾升軌，上周五收報3.19元，升0.17元，成交1,336萬股，收市後公司宣布斥資11.6萬美元收購捷運國際建設約七成股權，以擴展西南部（如昆明）的業務。
截至去年底，北控水務持有之水務項目總設計能力達到359萬噸，按年增長2.4倍，而去年扣除可換股債券之估算利息前純利為2.36億元，營業收入增逾五倍至17億元，可見經營漸見規模。此外，去年十一月，公司與馬來西亞政府簽署污水工程處理服務合作備忘錄，若順利落實，將成功開展海外市場，有助確立在行業中的領導地位。
論往績，北控水務現價估值雖說不上便宜，但勝在行業前景佳，公司業務呈快速增長。上周股價掃高，交投亦配合。若新收購消息公布後，股價回吐守穩3元關，相信尚會有動作跟尾，下站目標價3.5元，止蝕位2.85元。