最近翻開報章，都有唔少篇幅報道泰國動盪問題，連香港保安局都決定將泰國外遊警示級別由黃色調升到「有明顯威脅」嘅紅色，更呼籲市民如無必要避免前往。泰國一直係香港人嘅旅遊勝地，我每隔幾年都會去泰國一轉，享受陽光與海灘，Relax一吓。如果只講旅遊，我絕對建議未到過泰國嘅朋友一定要去一次；不過當講起投資，我就會建議投資者應該盡量避開啦。
其實投資世界入面，政治因素同經濟發展密不可分，而經濟發展亦都同公司發展及增長有極高相關性。不過好多時候，投資者都搞唔清股市同政治嘅關係，大部分人都淨係花心機研究唔同行業發展情況，又或者係個別股票走勢，但卻從來唔留意政治發展情況。
先揀市場再選龍頭
記得德國股神安德烈．科爾托蘭尼曾經講過：「人們常問一個問題，政治和股市，誰影響誰？歸根究柢，這是個雞與雞蛋的問題。」一個國家嘅政治對股市有着巨大影響，因為利率、稅務政策、經營環境都同政府有關係。政治變化會影響到國家內企業未來表現同埋投資者信心，就以泰國為例，試問如果你係分析員或者專業投資者，你會願意投資一個有機會經常出現局勢動盪嘅地方嗎？於是，泰國近年環球投資市場嘅表現就一直跑輸其他東南亞國家，投資者始終提不起投資泰國嘅信心。
成功投資者應該「從大到小」去做投資，意思就係話投資者應該首先要選擇市場或地區，然後選擇行業，最後一步先選擇龍頭股份去投資。因為經濟（股市）跟政治不可分割，如果一個國家嘅政治因素良好，國家經濟應該都 會有正面發展，位處當地的企業理應受惠。
何謂「紙交易」？
「紙交易」（Paper Trade）即是模擬交易，不涉及真金白銀。投資者初哥可自行記下買入及賣出價，記錄盈虧，又或參與坊間的模擬投資比賽，感受市場氣氛，為日後真正買賣作好準備。