港股繼續禾雀亂飛，但跌市中內需股依然不乏捧場客，即使今年上半年內地零售表現仲係一般，但到下半年樓股兩旺，財富效應開始發揮作用，推動零售銷售回復到○八年海嘯前水平，分析員都預期明年開始，零售及內需行業會重拾增長。尋日所見，聯華（00980）升6.4%、被大摩唱好的蒙牛（02319）升4.7%、金鷹商貿（03308）升3.2%、雨潤食品（01068）升2.7%。

春天定價唔算平

新股春天百貨（00331）尋日剛剛截飛，據聞市場反應唔錯，但睇番定價絕對唔平，1.65至2元的招股價，以預測○九年盈利為2.2億元（人民幣．下同）計，預期市盈率介乎26.4至32倍，現價平過佢嘅同業唔少，好似聯華及茂業（00848），○九年預期市盈率都只係27.2倍及24.4倍，假如春天百貨最後以上限定價，加埋開高些少畀孖展客落車，買「現成」零售股，似乎比較上算。

聯華是一直被低估的內地零售商，也是筆者心水之一。○三年已經上市的聯華，早幾年表現唔算標青，○四至○七年盈利介乎2.15億至2.68億元，到○八年才有較大的增長，盈利升四成四去到3.88億元，這主要同毛利率幾年來持續改善有關。要知超市生意額大，但利錢唔算豐厚，以聯華為例，每年做207億元生意，而每做100元生意，純利才不過1.87元，看官也可以想像得到，1%的毛利其實已經是極大的進步。

規模效益漸發揮

超市經營最重要仲係成本控制，以及能否發揮規模效益，當連鎖店網絡夠大，就有足夠籌碼同供應商在上架費及訂貨時討價還價。早前聯華由股東手上收購「華聯超市」，一下子令規模擴大三分之一，分店由3,900間增加至5,300間，估計最終的好處，會在未來一兩年陸續浮現。早前聯華公布十月同店銷售有5%增長，睇落唔起眼，但對比首三季2%的跌幅，已反映零售市道升溫對聯華的好處，唔少大行預測，其同店銷售增長勢頭，會由十月的轉捩點延續落去。

過去兩個月內，聯華股價由16元抽升至21.7元，升幅近三成六，短期可以等整固出現，但這零售股龍頭，中長線仲係有買貴無買錯。