國際金價突破每安士1,200美元，繼續大漲小回。從商品價格及匯率走勢來看，全世界都睇死美元無法翻身，若此論點成立，作為重要資產市場的股市，只會繼續往上走。

放大圖片

放大圖片

再睇香港嘅情況，由於實行聯繫匯率，港元資產隨美元弱勢而貶值，喺強勢貨幣持有者眼中，香港資產好平好吸引，特別係如今中國喺全球經濟發展中擔當重要角色，外資更加樂意押注香港股市，故見資金不斷湧港。雖然限於目前嘅估值，大家可能會對股市再大升有保留，但開淡倉如同跟「錢」對着幹。

前日阿莊提及嘅威勝集團（03393），走勢對辦，阿莊以平均價7.3元追入5萬股，估唔到上啱一隻「快艇」，午後高位曾見8.29元，收報8.2元，升15.9%，短炒有位就會食胡，但由於組合所持現金較少，有需要適量減持其他股票，故尾市以4.95元沽出中國鐵鈦（00893）6萬股，獲利4.9萬元。

基建股表現回勇

靜咗好耐嘅水泥建材股，近日終於發力。消息指，內地明年將繼續投資各項大型基建，圍繞樓市嘅政策不明朗因素亦暫時排除，故相關股份借勢回勇，今日就睇睇中國龍工（03339）。

龍工主要從事建築機器銷售及融資租賃業務，上半年行業需求逐步復甦，加上主要原料鋼材價格相對穩定，公司研發嘅新產品技術有效降低成本，故相信下半年業績可勝過上半年，明年可更全面體現行業復甦及競爭優勢。

高盛最近亦發表報告，將龍工嘅評級上調至「買入」，並納入「確信買入」名單，目標價由5.36元上調至5.9元。但另一方面，鄧普頓基金最近喺市場減持龍工股份，可見大戶取態各有不同。

不過，昨日龍工股價重上5元關，收報5.05元，成交增至9,385萬元，可見「有人辭官歸故里，有人漏夜趕科場」，既然BUY SIDE佔上風，同類股氣氛亦利好，短線企穩5元樓下，唔怕小注一試，目標5.6元，調整支持區喺4.5至4.7元。