本文重點
期指結算過後，市況終於見真章。日股昨日收市轉升為跌，而深、滬股市分別狂插7.1%及6.7%。恒指最低曾見19,592點，收報19,724點，大市成交增至673億元。跌市成交增，並非好兆頭。睇嚟喺內地再有新政策提振投資者信心前，市況仍以調整為主，別心急入市撈貨。
聯通（00762）上周宣布中期業績，純利66.16億元人民幣，倒退45%，管理層已表明，下半年EBITDA仍有壓力。事實上，三大電訊商競爭激烈，目前大家都在投放資源搶攻市場，並非講利潤嘅時候。唯一符合市場預期嘅係，聯通正式與蘋果公司就未來三年喺內地推出iPhone手機合作銷售達成協議，公司將於末季推出WCDMA制式嘅iPhone 3G手機，此舉能否有效提升其整體ARPU水平，相信最快要到明年首季至次季才會明朗，此前股價可能有波幅冇升幅。
昨日市況跌勢全面，早前熱炒嘅二、三線股輪流洗倉，部分中資股亦跌到不似「股」樣，好似隻聯想（00992），昨日一度低見3.19元，收報3.27元。由於未有及時「逃生」，跌至現水平惟有選擇再坐一會。
國策支持現承接
不過，有產業政策支持嘅中資汽車股現承接，如駿威（00203）昨日逆市升1.7%，收報3.45元；比亞迪（01211）中期純利幾近翻一番，刺激股價上升8%。此外，東風汽車（00489）股價亦升1.3%，收報8.02元。東風中期純利同比增長5.4%，至26.06億元人民幣。期內公司嘅乘用車銷售量同比增長23%，但商用車銷量卻倒退27%，限制整體增長表現。
期內商用車嘅銷量表現，正好反映實體經濟狀況，全靠中央政府及時推出各項支持汽車產業嘅政策，如「汽車下鄉」及「以舊換新」，力托乘用車市場，內地汽車企業才幸免於難。上半年東風嘅乘用車銷售增長高於行業約3個百分點，反映公司具備競爭優勢，難怪上半年股價升勢停不了。
展望下半年，產業政策支持因素猶在，惟計及成本回升嘅因素，若下半年經營表現能維持上半年嘅水平，已算有交代。現價估值屬合理水平，只係考慮到市況表現及第三季內地商用車銷售復甦進度，待股價回試7元水平承接，值博率會較高。