本文重點
時富金融（00510）講股名嘴之一羅尚沛升咗職，由研究部董事轉做中國資本投資部董事，集中精神發展中國市場，而研究部董事一職則由李海代替。太子知道佢升職，當然係第一時間祝賀佢。佢話以往都經常喺內地工作，所以已經習慣咗中港兩地飛。佢仲同太子講，日後可以一如以往，搵佢傾偈。
羅尚沛喺證券界已有十五年經驗，仲一向專注研究中資概念股嘅投資價值。太子成日向佢請教，今次時富畀佢嘅新任務，相信可以應付自如。睇番時富提供嘅資料，佢日後嘅工作，主要喺內地向客戶提供中國投資策劃管理及買賣服務。
李海接任研究部董事
目前時富喺內地四個城市設有諮詢服務處，包括深圳、上海、北京及同埋重慶。
而新任研究部董事李海，對能源及銀行等行業都有豐富嘅研究經驗，擅長分析及發掘中資股，加入時富之前，曾經喺中港兩地金融機構從事研究工作。