本文重點
電訊盈科（00008）私有化搞咗幾個月，最後被推翻，可謂是本港小股東維權活動嘅經典案例，電盈今日舉行股東周年大會，據聞會有好戲睇，邊個擔正主角？應該會係電盈小股東聯盟成員陳仲翔。佢仲話，為咗要電盈管理層正視小股東權益，他正考慮毛遂自薦做電盈嘅獨立非執董。
着特製T恤去股東會
陳仲翔在反對電盈私有化過程中一向表現積極，太子傳媒老友尋日同佢傾開，佢話由於董事委任是在大股東牢牢控制下，要自薦做獨董根本無勝算可言，但如果今日會上有機會，他仍願意「明知不可為而為之」，究其原因，係佢對大部分電盈獨立非執董嘅表現實在不滿，而自薦就係要公司正視問題所在！佢仲話，電盈小股東聯盟嘅多名成員已約定會穿一款「非常有意思」嘅T恤出席股東會，叫老友留意喎！
佢唔肯講件T恤有乜特別，老友就八到T恤應該係白色，上面寫上「I love PCCW」，弦外之音大家心照喇！