杜德偉、曹格、品冠及阿牛在澳門百老匯開騷晒靚聲，杜德偉被三千名觀眾「集體勁射」，全場大嗌「射你阿媽大燈」，原來是馬國話「歡迎你」的意思！

Alex帶領觀眾大叫「射你阿媽大燈」。

曹格帶囝囝上台，大晒溫馨父子情。

Alex與女舞蹈員跳辣身舞。

曹格（右起）、Alex、品冠與阿牛在台上Chok甫搞氣氛。

文：音樂組

杜德偉（Alex）、曹格、品冠與阿牛（陳慶祥）前晚在澳門百老匯舉行《男聲MPOWER力量》演唱會，打頭陣的阿牛落台與觀眾近距離握手。而拖着寶貝仔上台的曹格坦言早前因工作忙而無暇照顧囝囝：「老師問囝囝『爸爸究竟做咩？』，佢話『I Don't know呀！』我之前做過好多事，有啱有錯，都係成長一部分，但我會一步一步行落去，同仔女一齊成長。」

與女Dancer辣舞

曹格重提去年參加內地歌唱比賽《我是歌手2》時，在首輪被叮出局：「係咪公平？我唔知喇！其實係公平嘅，我返屋企有諗吓，自己一定有問題，我領悟到一件事，就係每個人生出嚟都係冠軍。」壓軸登場的Alex在唱出名曲《脫掉》時，一改以往剝淨底褲的習慣，只除下外套與女舞蹈員跳辣身舞。

最後四子上台時，全場三千名歌迷為他們舉行一次另類的歡迎儀式，事緣Alex憶述到訪馬來西亞時，身邊不少人對他說「射你阿媽大燈」，令他一頭霧水。身旁的馬國歌手阿牛解畫指這是馬國話「歡迎你到來」的意思，最後Alex帶領觀眾大叫「射你阿媽大燈」，全場「射」聲四起！

揚言剝到70歲

在後台訪問時，問到Alex為何今次如此錫身？Alex笑說：「要畀驚喜大家。」曹格則大爆對方揚言要脫到70歲。