「美魔女」羅霖推出處女寫真贏盡口碑，更威到國際，昨日她分別舉行簽名會及祝捷晚宴，宣布將以50歲之齡勇闖樂壇，並找來歌手馬嘉均合唱壯膽，再創奇迹！

羅霖打扮性感出席簽名會，獲大批粉絲到場支持。

羅霖與馬嘉均合唱壯膽，為闖樂壇試水溫。

羅媽媽連走兩場支持愛女，令羅霖十分感動。

羅霖（Candy）昨午在書展為處女寫真舉行簽名會，獲逾半百粉絲撐場，她表示寫真會發布至世界各地，是人生的奇迹，晚上則舉行祝捷晚宴。而羅媽媽全日現身撐愛女，Candy即席與歌手馬嘉均Jam歌展歌喉，獲藝人楊逸嘉送贈鮮花。

感激母親力撐

Candy預告將進軍樂壇，踏上歌手舞台：「公司諗住同馬嘉均合作，由佢作歌，我同佢合唱，進軍樂壇，對我嚟講係一個好大嘅考驗，半百先嚟做歌手，加上我結婚生完小朋友後，就冇再去唱卡拉OK，冇機會練歌。我好鍾意唱歌嘅，仔仔都遺傳咗我嘅音樂細胞，一返屋企唔係開電視，係聽歌，所以嚟緊要拜師學藝，大家都知我對自己要求好高，如果五音不全就唔會出嚟見人。」她又透露稍後將與薛家燕合作拍攝微電影，並揚言不介意做醜角。

Candy隨後眼泛淚光感謝媽媽這些年來的支持，並擁着母親哽咽說：「媽咪已經75歲，都嚟支持我，總之冇我媽咪就冇今日嘅羅霖，好記得媽咪講過『我哋一家人有飯食飯，有粥食粥』，有今日嘅成績係我媽咪嘅功勞，希望佢身體健康，總算畀到個安慰佢。」

唔敢放縱大食

而羅霖在簽名會中透露寫真銷量理想，多到擔心「印唔切」，又表示現時全世界也知她年屆50：「本來諗住放縱食零食輕鬆吓，但依家要保持身形，我仲要宣傳本書，我好似代表香港同世界各地女仔比咁，似再次參加選美。」她又指將展開內地巡迴簽名會，首站是廣州。她自覺已為兒子立好榜樣，認為會有奇迹發生，夢想可實現。