謝天華昨日在養和醫院接老婆李天恩（Tina）及囝囝謝浩飛（Theo）出院，問到是否回家就煲薑醋？他笑說：「有陪月員幫我做，唔使自己落手落腳，我淨係知呢排啲薑好貴！」雖然已準備隨時起身餵夜奶，但他直言對抱B束手無策，亦未敢幫囝囝沖涼。他又表示已叫陳小春等好友稍後才上門探B：「一來佢哋有工作在身，二來呢排醫院多流感。」

謝天華到醫院接老婆及囝囝Theo出院。

至於好友梁烈唯昨日在紅磡出席長者活動時則大讚Theo靚仔，提到何時做爸爸？他說：「等天安排啦！（有冇生仔秘方？）好似話爸爸唔好浸咁多熱水，咁樣會活躍啲，原來生仔同生女都有分時間！」