蕭正楠和黃翠如情侶檔演出劇集大受歡迎，帶挈兩人接Job登台搵真銀，據知蕭正楠於高峰期一個月接八個內地登台騷，目前亦有廣告客戶斟他與翠如拍廣告，對此蕭正楠笑說：「梗係想！最多畀個開心情侶價！」

翠如與蕭正楠為宣傳劇集到街市買餸，又幾有夫妻Feel噃！

曹永廉畀黃智雯「挑逗」，即嘟嘴賣萌。

翠如與高Ling登上今期《好報》B冊封面。

蕭正楠在清遠登台時落力表演，抵佢賺咁多嘅！

無綫劇集《師奶MADAM》反應良好，令主角蕭正楠和黃翠如不停接登台騷及商演搵真銀，翠如於香港有不少搵銀機會，而蕭正楠拍劇時間較長，劇集效應令他在內地有不少登台機會，據知他一場最少袋十萬元，最高峰更一個月接八個Show，認真和味！近期不少廣告客戶都向他們問價，打這對情侶檔的主意，蕭正楠接受電話訪問時說：「好奇怪，我哋未試過一齊去外面登台，不過之前因為拍劇都推咗好多Job，依傢趁有時間，搵得幾多得幾多，廣告就梗係想齊齊拍，最多畀個開心情侶價！」

亂叫女友錫張景淳

另外，蕭正楠、黃翠如、曹永廉、黃智雯及張景淳昨日出席《師》劇宣傳活動，大會為張景淳慶祝34歲生日，蕭正楠竟叫翠如獻吻，他說：「佢好有分寸，都冇錫呀！」而翠如化了一個鬚根妝，與正蓄鬚的男友情侶鬚根Look，她說：「今日要街坊Look嘛，留鬚Man啲，戲裏面都有畫鬚！」

蕭正楠又透露翠如上網學煮西班牙飯，問到是否娶得過時，他說：「佢喺隔籬，佢怕醜，我下次先答。」

任《好報》封面女郎

此外，黃翠如和高海寧（高Ling）昨日擔任《好報》B冊封面女郎，相約食賀年菜預早攞頭彩，齊齊「撈起」，翠如談到家中的新年「習俗」是要由內到外也換上新衣，高Ling則指在家掃地的方向要跟規矩，若去年順境要向內打掃，不順則要把衰氣往外掃。