張美妮於2013年與髮型屋老闆黃國強（KK）結婚，為了做100分人妻，她坦言改變很多，由亂發脾氣到體諒老公工作的辛勞，並由之前心急生仔到現在懂得享受二人世界，她又感激老公準備了最感動的求婚！

張美妮感激老公特別準備的浪漫求婚，令她十分感動！

為了成為完美人妻，張美妮決心作出改變。

張美妮與老公KK結婚兩年，至今仍相當幸福。

美妮一直都想要一個畢生難忘的求婚，知道老公不是特別浪漫的男人，亦不怕向老公坦白心中所想，現在回想求婚一刻仍甜在心頭：「最Sweet真係求婚，因為老公不嬲唔會特別做好Surprise嘅嘢，當時我開到口同佢講結婚係大事，真係要畀個最浪漫嘅求婚我，如果唔係我真係會唔開心！直到我應承結婚之後去巴黎影婚紗相，佢真係有畀心思諗過，喺巴黎鐵塔閃嘅時候向我求婚，令我好感動，佢真係會為我做啲佢覺得好老土嘅嘢！」

學識體諒

她又透露令她覺得老公可以付託終身的原因：「有次我爸爸身體有少少問題，要做手術，佢過去探我爸爸，買嘢佢食、關心佢身體狀況，而佢從來冇特別同我提起，我覺得佢真心錫我屋企人，令我對佢加好多分！」

結婚對美妮的生活有很大改變，令她漸漸發現自身的不足之處：「以前我比較細路女，又大脾氣，我覺得做人老婆唔可以再咁任性，我唔希望老公覺得娶咗個麻煩老婆，所以我訓練自己耐性。有時佢工作上有唔順，放工返嚟可能會黑口黑面，以前我會嬲，其實我應該體諒佢心情差，依家識畀佢靜吓，可能好簡單畀杯水佢，或者拍一拍佢膊頭，或者同佢講吓隻狗仔輕鬆吓！」

心急生B

結婚後，不論身邊的人還是自己都心急生B，美妮說：「結完婚個人心急，身邊又好多人問，好想快啲生BB！但愈心急愈難遇到，而且有時我會覺得未適合做媽媽。我知道唔可以急，最緊要享受同老公二人世界！我有生BB嘅打算，仔女都冇所謂，好老土咁想湊個好字，不過都係隨緣啦！」而家務全部由美妮負責：「我受屋企影響，爸爸主外，媽咪主內！所以我都係咁諗，付出完覺得超有滿足感！」