陳豪前晚出席倒數活動時透露，懷孕7個多月的太太陳茵媺狀態不俗，夫婦更欲尋求生女秘方追多個！而胡杏兒則坦言與幾名追求者認識中，近日忙於到內地參加真人騷的她弄得周身傷，雖然酬勞可觀，但絕對是辛苦錢！

陳豪及杏兒甫出場即向現場觀眾打招呼，引來一陣歡呼聲。

新鴻基地產代理租務部助理總經理劉文豪先生、新鴻基地產代理租務部高級租務經理廖慧慈小姐及上水廣場高級物業及設施經理談國雄先生率領陳豪及胡杏兒等一眾藝員齊齊倒數。

帶同媽咪出席活動的陳豪極力護駕，果然孝順！

走向觀眾席的陳豪被粉絲捉實隻手，魅力沒法擋！

小鬼在台上獻Sing，聽出耳油。

小鬼與粉絲握手，十分親民。

小鬼送上愛的抱抱冧Fans。

陳豪、胡杏兒及台灣歌手黃鴻升（小鬼）等前晚現身上水廣場舉行的《華麗倒數派對迎15》活動，吸引大批粉絲圍觀，場面熱鬧。與母親同穿紅色服裝到場的陳豪，面對母親被傳媒拍照顯得不知所措，由於正在台上與嘉賓互動，惟有以口形拜託傳媒放過媽咪，其後他在獻唱時與粉絲握手，十分親民。

放假陪太太

心情大靚的陳豪又大談懷孕7個多月的陳茵媺（Aimee）的情況：「佢佗得比上次舒服，整體上係健康同開心，大仔依家一歲，要話佢知有個細佬嚟緊！」對於Aimee近日公開指想追個女，他得戚地說：「係我講先！不過大家想法都一致，要多個女唔大問題，有個女係開心。（會唔會問人生女心得？）都想，但會畀Aimee休息吓先，我拍緊套劇希望新年前完成到，到時會放假陪太太。（叫公司幫你放假前接多啲工作？）多啲嚟密啲手囉！」

小鬼「鬚」Quali

而一直渴望搵男友的杏兒則表示與幾名追求者認識中：「係圈外人嚟嘅。（有冇出街約會？）冇呀！邊度出到，會有狗仔隊跟！」近日忙於在廣州拍攝真人騷的她，笑言對酬勞感到相當滿意，但拍攝時卻周身傷：「好多瘀傷，但都開心，個節目一月中就播，我賺嘅都係辛苦錢！」

至於早前完成電影《角頭》的小鬼則透露，戲中飾演一位社團大佬，個性很惡兼要留鬚，但粉絲不喜歡該造型，故完成戲份後即剃掉鬍鬚。