女星冼色麗(Bonnie)入行7年,一直默默耕耘,雖然星途平淡令她曾萌「去意」,但隨着時光飛逝,Bonnie漸漸學會「等待」,機會來到便好好把握。她自嘲演員乃人生第一份工,故定必好好經營,至於感情方面,敢愛敢恨的Bonnie笑言願為愛情放棄事業,只是當下仍未遇到Mr.Right!

冼色麗

於2012年加盟英皇的冼色麗(右三)工作機會大增,更有幸與公司一眾前輩合作鬥戲。

冼色麗(左起)於電影《DIVA華麗之後》與劉浩龍及容祖兒等合作磨練演技。

於電影《喜愛夜蒲》與陳柏宇(右)合作的冼色麗,常獲導演錢國偉指點。

於電影《囡囡》不Q乏性感戲份的冼色麗演出大膽,卻未有引起極大回響。

32歲的冼色麗原本計劃於26歲結婚生B,可惜事與願違,那只好邊搏殺,邊等待真命天子來臨!

虛度5年?有啲嘢急唔到!

當年參加影視新星大賽成為演員的冼色麗曾參演電視劇,至2007年簽約電影公司便主力於影壇發展,曾拍攝《囡囡》、《喜愛夜蒲》、《DIVA華麗之後》及《出軌的女人》等作品,雖然演技不俗,卻未有令人留下深刻印象的代表作,故Bonnie終決定於2012年離開舊公司,加盟英皇電影成旗下藝人,希望為事業帶來新衝擊!

閃過放棄念頭

談到於舊公司的5年光景,Bonnie表示除有機會接觸電影外,亦經歷了不少,累積了一定經驗。對於在娛樂圈浮沉多年,她靦腆地說:「都係一個過程,有啲嘢急唔到,演員係被動,我都學緊要面對。(覺得力不從心?)所以慢慢學緊。(有冇感到心灰意冷?)一定有,我覺得要學識『等』嘅過程最難,初初唔知點,會亂諗嘢,後來慢慢同公司溝通到就好啲,身邊朋友建議我去學嘢或者去旅行,令自己吸收嘅同時又可打發時間。」演員是被動的,機會亦非時時有,Bonnie承認曾閃過放棄的念頭:「呢行機會嚟到,但好快唔成事機率比較大,要接受囉!試過唔開心就想放棄,諗住讀書先,因為我讀完書未做過其他行業,如果唔做呢行又可以做咩呢?(遇過唔鍾意都拍?)當然有,都要做。(向公司提出?)新人都要接受,反而係點令自己將件事由唔鍾意變成鍾意。」

冇人問價!我係咪冇呢個市場?

基於沒有其他特別技能,Bonnie只好選擇留守娛樂圈,她笑說:「成長咗接受能力大咗,遇到問題冇咁易放棄,學識點說服自己。」雖然不少藝人都會主動自薦,惟她自言不敢太主動,每每只是向認識的客戶輕輕提過,即使對方沒有下文,亦沒有勇氣再追問。對於娛樂圈有潛規則的傳聞,她強調未曾被人問價:「可能出嚟做嘢身邊一大班人帶住,我又少出去玩,工作以外少見到我,食飯就有,問價係冇,咁我係咪冇呢個市場呢?」

熟男照殺?OK!唔過15年以上!

現屬單身一族的Bonnie對感情事處開放態度,即使身邊有追求者,卻欲把重心放在事業上,皆因32歲的她不想再浪費時間,又不諱言曾定下人生規劃:26歲結婚生B,但至今仍未遇上心儀對象,故只好把計劃無限期延後:「入咗英皇多咗好多機會,成個人都開心咗,以前我冇咩方向,所以依家想繼續衝吓先!婚可以遲啲先結,享受吓幾年拍拖二人世界先!(覺得自己係小鳥依人定敢愛敢恨型?)敢愛敢恨啩!一時時啦,要睇對方點,對方好強勢就即刻被比下去。(揀成熟男仔?)成熟我OK,唔好太大,10年都OK,最好唔好15年以上。(為愛情放棄事業?)應該會,但如果我好鍾意佢,理由係生仔就唔得,似交換條件,啱Timing可以接受,好似婚後想要小朋友,頭幾年要留喺屋企照顧,要我退後一步我又OK喎!」

失憶避是非

Bonnie可算是圈中鮮有是非及不和事件的女星,但問到有何秘訣時,她竟指全拜自己失憶所致:「我好鍾意八卦人哋啲嘢,但當人哋講咗一樣嘢後,我轉頭就會唔記得,之後又會喺同一樣嘢上面不斷問,所以恕我無能為力將佢發揚光大!其實大家唔係點影到我,因為平日收工我會返屋企,都會行街食飯,但唔係做搞手嗰個!」

Profile

姓名:冼色麗

英文名:Bonnie

出生日期:1982年10月1日

作品:電影《喜愛夜蒲》、《囡囡》及《救火英雄》等