「熊貓宅女」AGA還歌債冇情講

提到新歌大獲好評，AGA沒想過有此佳績，全因努力還歌債，與金牌監製兼師傅舒文躲在錄音室寫歌，她說：「冇乜出街，好宅，只係喺屋企同錄音室。」她透露寫下20多首Demo，但公司才揀了一首：「就揀咗《一》呢首歌，原本首歌係四、五月出，因為編曲改咗三次、詞改咗兩次，加上我同舒文想首歌做到自己嘅感覺。（揀得一首唔失望？）公司想我形象統一啲，因為我乜都寫，加上用英文寫Demo，變番中文又要計數。」

情緒化難搵伴侶

由於《一》曲是講述如何找另一半，單身的AGA被問到是否找到另一半時笑說：「未，要搵另一半真係難，可能做音樂比較情緒化，尤其寫歌時可能係好開心，突然又會唔開心，都幾癲o架！遷就到我係要有啲犧牲！」她又指歌曲是表達錯愛：「雖然錯愛，但都係一個學習，令自己做得更好。（有冇錯愛過？）有。（前度好差？）性格唔啱，火星撞地球，我係一個好冷靜，但係冷靜到唔出聲嘅人。」問到有否遭男友拳打腳踢，她笑說：「冇畀男友打過，不過細個學過柔道。」

AGA大方透露入行後有不少追求者，但由於太宅女而嚇怕對方，加上每次出街都是一大班人：「自己冇乜時間，工作日夜顛倒得好犀利，有人笑我可能係最深黑眼圈嘅歌手，其實我係過緊美國時間，如果同一個正常男仔拍拖都幾難！」將工作排第一位的她坦言現時是搏命期，有心儀對象都要放棄：「除非工作好穩定。（唔會孤伶伶？）好彩我嘅性格好獨立，悶嘅時候會自己睇戲。始終依家仲係啱啱入行，有機會自己做碟，所以搏晒命做！」

每天只睡四小時

對於容祖兒在網誌留言大讚新歌，AGA說：「我有睇到，即刻諗係咪真，打畀舒文問佢睇唔睇到，佢話祖兒打畀佢話鍾意首歌。（好幸運？）好彩o架！今次隻碟公司畀我哋做晒，真係好好彩。（有壓力？）我慣咗同舒文嘅做嘢模式，以前同佢寫咗五年歌，慣咗畀佢催逼，今次更加有默契。」

近日努力還歌債的她透露每日只有四個小時休息，問到會否將好歌留給自己，她說：「正常人會咁諗，但唔會做到，通常寫歌畀人，會聽佢近排唱緊咩，要咩古仔，然後盡快交歌畀佢，之後先寫畀自己。」她又透露每朝都被愛貓Morning Call：「佢會跳上嚟係咁喵喵喵同摑你，因為中午錄Demo會有媽咪洗碗同狗吠聲，所以要夜晚先錄到。」

隨遇而安 心存感激

年底頒獎禮快將舉行，問到是否有信心新歌能打入《十大》，AGA說：「唔敢諗，驚有希望就會有失望，隨緣啦！唔諗太多，上咗榜、多人聽已經好開心，都多朋友講鍾意呢首歌，同埋多謝好多歌手，因為佢哋會喺自己嘅平台幫手推首歌！」