Jeana聯隊藐爆袁嘉敏出晶降火

袁嘉敏「升呢」於新戲當女主角，即遭同片女演員杯葛！慘變獨孤精的她卻死撐「唔覺」，問到是否與拍檔Jeana（何佩瑜）爭戲份時，袁嘉敏還自覺「重要」，推監製王晶出來欲平息是非：「佢喺我隔籬，要唔要問吓佢吖？」

袁嘉敏擺晶哥上枱望平息是非。

Jeana暗示有人擺款激嬲全廠，要她賣笑打圓場。

當袁嘉敏上香時，Jeana索性擰歪面當睇唔到！

袁嘉敏（右）「壓軸」出場拜神，Jeana（左二）喪睥以示不滿！

梁敏儀指拍戲講求合作無分大小，女主角與否只是其次。

唐紫睿寸袁嘉敏「獨女」一名，講到明與對方冇嘢講！

最近答允全裸演出王晶新片《鴨王》的袁嘉敏，人氣被炒高後即傳是非！有指劇組早前齊集一班主角拍海報，獲安排擺臥地甫士的她即呻「腰痠背痛」，甫士生硬兼要求「插隊」影單人照，搞到現場氣氛變僵，最終她以趕時間為由率先離場。電影公司昨日安排一班女角以三點式登上遊艇開鏡拜神，殿後的袁嘉敏「壓軸」現身，令其他三位女角終按捺不住齊齊「藐爆」，大合照時袁嘉敏與Jeana等人企得「生疏」，多番提點才「扮親熱」。

事後，與袁嘉敏戲份相若的Jeana接受電話訪問時被問到有人影海報時傳擺款，她自爆做「丑」人：「其他嘢冇留意，因為嗰日我忙於做小丑，氹番大家開心！（袁嘉敏要求早走？）總之我係最後一個留低影單人相！（佢強調自己係女主角？）其實電影係Team Work，拍出嚟觀眾喜歡、票房大賣先係重點，如果唔係畀個女主角銜頭你又有咩用？實力先係最緊要﹗」

「同佢冇講嘢」

同場的梁敏儀與唐紫睿（Hazel）亦不屑袁嘉敏的言行，句句寸爆，敏儀說：「我只係同Candy（袁嘉敏）合作過《賭城風雲》。（知佢因海報事件而犯眾憎？）我知佢嗰日係好趕，要早走！（你哋冇交流？）暫時冇同場，但拍戲啫！開工係Team Work，係咪女主角唔重要，最重要係有禮貌！茶水、服裝阿姐都係打份工，無分你我，要和平相處！」Hazel則指袁嘉敏係「獨家村」：「我同佢冇講嘢！（你哋冇溝通？）呢個係佢性格，亦係佢一貫作風，佢唔想同人接觸，係『獨家村』！（擔心被搶風頭？）我對自己有信心，唔使好似佢咁出嚟宣傳都可以露半個胸，我做唔到！」

對於被一班拍檔群起「藐爆」杯葛，袁嘉敏則死撐說：「吓？唔知喎！我冇同佢哋同場，同梁敏儀合作過但都唔係好熟……係咪今日凍咋？（你同Jeana爭戲？）晶哥喺我身邊，要唔要問吓佢呀？總之我份約寫明我係女主角。（戲份多過佢？）應該係。」