現年32歲的冼色麗（Bonnie）出道六年多，曾拍英皇電影《DIVA華麗之後》及《Delete愛人》等，一直甚少緋聞，雖然近日未有新工作，但原來已搭上新歡。她日前被發現與貌似謝霆鋒的型男偷偷到海洋公園密會，據知，該名男士和Bonnie相識多年，從事金融界，對Bonnie一直有好感。當日，「金融界霆鋒」對Bonnie照顧周到，除化身「龍友」四圍又踎又企為伊人留倩影外，更出錢請Bonnie食熱狗，兩人又毫不避忌一杯汽水兩份飲！

冼色麗與「金融界霆鋒」被影到同遊海洋公園。

「金融界霆鋒」玩遊戲贏得多啦A夢公仔，立即轉送女友，氹得Bonnie十分開心。

適逢「哈囉喂」鬼影處處，細膽的Bonnie與貞子合照時，被鬼爪突襲捉頭兼喪追，嚇到Bonnie花容失色周圍匿，「金融界霆鋒」見狀即幫手「驅魔」，隨即帶Bonnie去多啦A夢鬼屋定驚。期間二人又頭貼頭玩自拍，行為親暱。其後，二人又玩攤位遊戲掟波波，可惜Bonnie一路掟極唔中，「金融界霆鋒」即盡全力狂掟，終贏得一隻多啦A夢公仔，抱住公仔又攬又捽的Bonnie即甜笑冧到暈，最後玩至黃昏便離去。