冼色麗生命只因有戲

娛樂圈新人輩出，雙十年華的青春少艾如恒河沙數，面對如此多威脅，冼色麗（Bonnie）坦言唔驚得咁多：「其實由始至終我嘅目標都好清晰，就係演戲第一，其他嘢唔驚得咁多。」一個演員確定目標後，下一步便離不開努力：「我平時會睇多啲電影去偷師，如果覺得嗰場戲好正，我就會不停重複睇好多次。睇人哋點演之外，仲會幻想吓如果係自己嘅話會點演，呢個係一個好有趣嘅過程！」

代入角色 真我演繹

無論是四年前在電影《囡囡》中飾演的援交少女，還是早前在電視劇中扮演的正義女孩，Bonnie都是真我演出：「當我接到一個劇本嘅時候，自然代入去理解角色，我知道自己做戲都係好直接，因為我冇辦法去創造一個憑空想像嘅角色，所以之前演嘅每一個角色，都有某部分嘅我喺度。」因此對Bonnie來說，從影以來的每個角色都十分難忘，她笑言除了對白外，每次的拍攝場景都會歷歷在目。

入行七年的Bonnie，演過不同大大小小的角色，被問到最想拍的電影類型時，她一如普通女生般最憧憬拍攝愛情片，但原因卻無關風月：「因為出道以嚟，我大多數拍嘅電影都係以男性為主題，未拍過完整嘅愛情戲，有機會真係好想試吓！」談到現實中的愛情觀，Bonnie同樣Cool到爆：「對於愛情，我一直都係抱住開放嘅態度，冇話一定要幾時拍拖生仔，因為我身邊好多人都好Open，會畀我好大空間，所以愛情來臨嘅話我亦唔會抗拒，只要係自然發展，就算要我生仔結婚都可以。」

經歷低潮 家人Back Up

自言有點兒執着、有點兒自我的Bonnie，一直在娛樂圈勇往直前，但面對低潮時，她坦言幸好有家人的支持：「某程度上點解我敢去面對唔同嘅挑戰，係因為我有支持我嘅屋企人。我屋企雖然係屬於比較傳統嘅家庭，唔會成日將愛掛喺嘴邊，但由細到大佢哋都好信任同支持我嘅決定，亦唔會畀太多壓力我，所以我覺得好幸運。」

冇劇本又如何！

有人話「人生如戲」，小記向愛演戲的Bonnie拋出一條抽象的問題：假如生命是一齣戲時，你的人生又是怎樣的一套電影呢？開朗的Bonnie笑言自己的人生會是一套冒險片：「因為我比較鍾意嘗試唔同嘅嘢，如果我嘅人生係一套電影，我唔會為呢齣戲設下底線或跟隨所謂嘅計劃！有時可以天馬行空或者脫軌嘅演出都唔錯，最緊要係要過得不枉此生！」

Profile

冼色麗（Bonnie）

年齡：31歲

代表作：《囡囡》、《分手說愛你》、 《出軌的女人》、《封神榜之武王伐紂》、《同里有親》

出道經過：參加內地選秀比賽入行，及後2007年被美亞娛樂子公司天下明星簽約，成為旗下藝人。2012年加入英皇電影。