黃秋生、關禮傑、陳煒與湯鎮業等最近在上海為無綫新劇《梟雄》拍外景，日前拍攝關禮傑捱車撞飛數米、吐血倒地的一幕。秋生激讚關禮傑親身上陣：「關禮傑真係堅！親身吊威吔，話晒都幾廿歲人，仲飛咗成十幾個Take，身手真係好，等我返去都練吓！（拍攝時有冇問題？）小問題當然有，好似之前有個景搵20分鐘都搵唔到，打電話問又冇人聽，第2日我反映番就收到7張地圖，多到要派畀人！我冇嘢喎，又唔係嚟搞事，基本條件解決咗。我專心演出，希望拍攝順利，如期10月底走！」

陳煒與湯鎮業在上海街頭坐古董車結婚，充滿懷舊風情！

他又否認無綫高層曾勵珍專程探班安撫：「係有高層上嚟，但我拍到『零零林林』，唔得閒理！反而見監製（王心慰）個樣日日都好似話梅咁，好大壓力，希望佢放鬆啲！」另外，陳煒日前穿上復古婚紗乘坐古董車，在上海街頭與戴假髮上陣的湯鎮業拍結婚戲，獲曾勵珍及馬海倫探班。