彭順愁容滿面擔心Liddy
已婚導演彭順上月被爆偷嗒o靚模李悅彤（Liddy），而Liddy的父親更是轟動全城的九龍灣吞槍自殺槍手李德仁，事件曲折離奇。潛水多時的彭順昨日蒲頭，據知跟Liddy失去聯絡的他，一方面擔心Liddy未能面對不斷的是非和不幸，另一方面與老婆李心潔的感情又有待沉澱。一臉愁容的彭順坦言想冷靜吓，並否認給了Liddy一大筆錢，更直指故事編得太離譜！
未獲老婆李心潔原諒的彭順在機艙內受訪。
父親竟是九龍灣槍手李德仁的Liddy接連面對是非與不幸。（資料圖片）
彭順（右）與林小強一起到北京傾工作。
彭順在快餐店內醫肚，但胃口欠佳。
彭順木無表情，準備登機。
彭順被爆偷食，心潔與女兒備受壓力。
導演彭順上月被爆背住老婆李心潔偷嗒26歲o靚模李悅彤（Liddy），彭順事發後亦即急返馬來西亞「補鑊」向心潔認錯，挽救婚姻，他倆於上月28日齊齊發聲明表示會共同面對，彭順亦在另一聲明中坦白認錯。其後，「小三」Liddy竟被揭發父親是轟動全城的九龍灣啟晴邨吞槍自殺事件的槍手李德仁，跟Liddy撻着的彭順此後便一直潛水。
彭順「失蹤」兩個多星期後，昨午終於「蒲頭」。約五時許，香港機場已聚集半百傳媒靜待由馬來西亞返港的彭順回歸，但他抵港後沒有出閘，即轉機前往北京，等候期間彭順在禁區內的快餐店醫肚，見他胃口普通，未知是否受事件影響心情。至晚上8時05分，彭順邊行往登機閘口邊接受記者訪問，全程愁爆及無奈。
記者：你係咪畀咗一筆錢安頓Liddy？
彭順：全部編出嚟，我都編唔到。
記者：你同Liddy係咪承諾過，會同李心潔離婚再同佢結婚？
彭順：冇，全部都係捏造出嚟，冇啲咁嘅事。
記者：知唔知Liddy父親嘅事？
彭順：知道。
記者：警方有聯絡你？
彭順：冇，但我都想知道情況，了解多啲，睇吓發生乜嘢事。
記者：會唔會係因為你哋嘅問題刺激到Liddy爸爸？
彭順：唔答。
記者：你有同個女傾過件事？（指Liddy偷食事件）
彭順：同個女都有傾過。
記者：個女有乜嘢表態？
彭順：唔答。
記者：同心潔嘅關係點？
彭順：OK啦！家事唔答，想Cooldown（冷靜）、安頓自己。
記者：安頓咗屋企人未？
彭順：要先安頓咗自己先。
好友爆失聯絡
據彭順身邊好友透露，他到北京是洽談電影計劃：「由於出事前已一早訂咗機票返北京，張飛點都要用，所以今次返香港後，直接轉飛北京傾電影計劃。」該好友又表示彭順心情仍愁爆，並非常擔心Liddy：「拖手照曝光後，彭順都搵唔到Liddy，加上槍擊事件後，更加搵唔到佢（Liddy）。彭順仲係好擔心Liddy，畢竟佢覺得Liddy廿幾歲女就要面對咁多大衝擊，身為朋友，心情都好沉重。」
至於心潔是否已原諒彭順，該好友說：「始終發生咁大件事，唔係一朝一夕可以解決，（彭順）要花好多嘢去再獲得老婆信任。」談到心潔早前被拍到殘爆到診所睇胃痛，該好友表示只是碰巧：「咁啱胃痛，件事未至於去到要睇醫生。」他又透露彭順完成在北京的工作後，會立即返馬國陪心潔。
短期內不回港
而飽受心靈創傷的心潔，據知心情仍未平復，所以短期內不會返港，待老公返馬來西亞後，兩夫婦暫時在當地定居。至於彭順離開馬來西亞後，心潔可會復工及身體狀況如何，她昨日透過助手表示一概不作回應。
另外，彭順原來將於8月開拍寰宇有份投資的台灣電影，現時有指未知能否如期開拍。對此，彭順好友、寰宇高層林小強表示：「最緊要套戲好，籌備充足，劇本同卡士都搞掂晒，遲啲開唔係問題，不過依家暫時冇咁嘅打算。」至於彭順現時的心情、跟李心潔的關係如何，林小強則說：「導演嘅私人嘢，我哋唔會回應。」
