洪金寶（三毛）前晚現身杜拜，力撐愛駒「崇山寶」出戰國際一級賽阿喬斯短途錦標。結果崇山寶跑第一，贏得60萬美元獎金。三毛形容愛駒衝線一刻，他感覺猶如尿急多時，終於得到解決，又表示想吃碗柴魚花生粥慶祝！

洪金寶（左起）、騎師莫雷拉、高麗虹、練馬師姚本輝及太太齊齊拉頭馬，影番張威水相。

洪金寶和太太高麗虹齊齊捧盃，十分興奮。

周家蔚昨日出席活動時，獲老公洪天明帶同囝囝洪大仁撐場。

洪金寶與太太高麗虹前晚現身杜拜世界盃日，為愛駒「崇山寶」出戰國際一級賽阿喬斯短途錦標打氣。戴上黑超的三毛難掩緊張，因為崇山寶雖擁「香港短途馬王」美譽，但與賽各駒亦屬世界級的馬中赤兔，難怪他在愛駒臨衝終點前，緊張得吶喊「Come On、Come On！」結果崇山寶在騎師莫雷拉胯下，不負眾望，首先衝過終點，除享世界級榮譽外，更贏得60萬美元（約468萬港元）獎金。

心情緊張

三毛賽後興奮得與練馬師姚本輝相擁，更在頒獎台上將獎盃高舉過頭，談到心情，他作出妙喻：「心情好似好尿急，一路都屙唔到，忽然間屙到嗰種『呀！』真係形容唔到，好緊張。第一次嚟呢度，未知隻馬對個跑道係點樣，由佢跳出嚟，一路到埋觀眾席，Everything好緊張！佢過咗終點，我都唔知佢過咗，仲以為佢喺度跑緊。（喺國際級賽事勝出有咩意義？）冇意義o架！唔係，我意思係對我哋冇乜嘢，我覺得香港所有馬迷都喺度戥我高興，佢哋可能仲嗌得大聲過我，好多謝大家！」他又指有特別的慶祝方式替愛駒慶祝：「我想食碗柴魚花生粥！」據悉，三毛當日以60萬港元購入崇山寶，連同杜拜賽事剛贏得的468萬獎金，已將獎金累積至1,214.5萬港元，證明三毛眼光獨到。

而樂壇天后「籮霸」珍妮花露柏絲（Jennifer Lopez）前晚則擔任表演嘉賓，穿上一身牛仔造型的她，谷胸騷腿大賣性感，更與舞蹈員又唱又跳大晒舞功！

讚老爺叻

三毛兒子洪天明與老婆周家蔚及囝囝洪大仁昨日出席兒童玩具博覽，周家蔚大讚老爺好叻：「好開心！老公都好緊張，佢知道攞冠軍後好想慶祝，但冇人陪，因為我去咗食飯。（老爺獲巨額獎金會否帶挈你？）令我好想生個馬女！」天明則在電話中說：「平時我會陪爸爸入場，但今次杜拜太遠冇得陪，好想同佢食飯慶祝！」

另外，好友任達華聞大哥在杜拜拉頭馬大表興奮：「好戥大哥開心，為咗要繼續開心，等我都抽番隻（馬），贏到一齊開心！」盧惠光則說：「大哥養好多隻馬，呢隻贏最多，戥佢開心！」陳百祥亦讚大哥好運：「知佢贏馬，為港爭光都戥佢開心，大哥成副身家放咗馬度，買馬不在乎平貴，睇運氣。（慶祝？）佢搞慶功一定搵我！」