張智霖（Chilam）、周秀娜及導演葉念琛昨日到會展宣傳新片《千億惡魔愛上我》，演闊少的Chilam穿西裝襯大褸，獲四名保鏢護送，扮MK妹的娜姐則穿低胸裝晒兩吋事業線及長腿，台上Chilam送千萬鑽錶給娜姐，娜姐則餵他吃雞蛋仔回敬。

張智霖為周秀娜戴鑽錶兼摸手仔，恨死宅男！

周秀娜餵張智霖食雞蛋仔，相當滋味！

Chilam表示兒時曾幻想是富豪，即被取笑現在很有錢，他笑說：「我係務實電影工作者，今次同娜姐拍拖，係男人夢寐以求嘅事！有親密戲，但浪漫為主，尺度唔大。」兩人將出埠取景，Chilam希望到北歐睇北極光，娜姐則想到浪漫的希臘。問到太太袁詠儀（靚靚）會否監場？Chilam扮惡說：「叫佢唔好阻頭阻勢，警告佢唔好跟住，佢嚟我就罷拍！」