昨日是謝霆鋒33歲牛一,工作至上的他在船上開工過生日。儘管前妻張栢芝帶同兩個寶貝仔Lucas和Quintus遠在溫哥華,可是王晶特意安排「晶女郎」童菲、吳辰君和內地女星景甜為霆鋒送上驚喜P,難怪霆鋒落船時成個謝晒!

經過一晚通宵不眠的霆鋒,面容略帶疲累。

戴着帽的霆鋒在船上開工兼慶祝33歲牛一,在助手陪同下乘接駁船到觀塘碼頭準備返歸。

吳辰君(左)和童菲齊齊坐車離開。

內地女星景甜亦有陪霆鋒玩通宵。

狄波拉自備愛心湯水給霆鋒。

自與栢芝離婚後,霆鋒連續兩年在工作中度過生日。近日忙於趕拍王晶執導新片《賭城風雲》的他,前晚已上船開工。因為栢芝帶同囝囝Lucas和Quintus遠走加拿大溫哥華,為免霆鋒33歲生日冇人陪,據知前晚要拍的場口不多,王晶特意派「晶女郎」童菲、吳辰君和內地女星景甜送上驚喜,踏正霆鋒生日唱生日歌和切蛋糕,陪他玩到通頂。

拉姑湯水賀壽

昨午12時,霆鋒在助手陪同下乘接駁船到觀塘碼頭準備返歸,同船還有吳辰君、童菲、景甜、張晉、王晶和監製劉偉強等,經過一晚通宵不眠,霆鋒面容略帶疲累,並戴墨鏡遮蓋倦容,即使記者上前講生日快樂,但他卻沒有回應,問兩個囝囝會否跟他慶生?他封嘴不答,問如何慶祝生日?他說:「唔會啦!好攰,要返去休息!」然後便上車返回寶雲道寓所,一直沒有外出。而母親狄波拉和經理人霍汶希(Mani)亦前往霆鋒家跟他慶祝,拉姑更自備愛心湯水,問送甚麼給霆鋒?她舉起湯壺說:「用心煲嘅嘢!」至於Mani則說:「佢乜都有,只係嚟睇吓佢!」

記者致電霆鋒,他表示生日不會刻意慶祝:「佢哋嚟睇吓我,頭先幾乎瞓着,只係阿媽嚟到令我好Surprise,其實我聽朝(即今日)一早就去長沙!」問是否掛住囝囝?他說:「梗係掛啦!不過唔多講喇!佢哋前幾日搞學校嘅嘢!」問囝囝在香港還是加拿大讀書?他說:「唔講喇!呢個話題好敏感!」不過霆鋒坦言會到加拿大探望Lucas和Quintus:「有時間一定會,其實我已經同經理人度期!」而霆鋒妹妹謝婷婷也在微博上載與哥哥切蛋糕照,非常溫馨。