葉熙祺口震 苟芸慧出擊

郭富城與前女友熊黛林甩拖後即緋聞纏身，先傳與苟芸慧撻着，日前又傳轉嗒內地o靚模葉熙祺，更有傳對方成功入住其豪宅，三角關係一觸即發！被指「攻城30小時」的葉熙祺昨日以透視性感Look行騷，對於「攻城」問題前言不對後語，更多次口窒窒，十分慌張。問到城城是否其男友？她說：「冇咁講過，係朋友，大家識咗好耐。（你去佢屋企？）冇喎！」問到之前來港住哪？她口窒窒表示來港是找朋友：「唔知佢住嗰度。（你住佢隔籬？）吓？其實係囉！」明顯是前言不對後語！有傳她與母親入住城城家，她說：「唔係，屋企人係佢Fans。（父女戀？）未諗過。」問到會否介意「父女戀」，曾與房祖名傳緋聞的她即暗寸對方：「男仔成熟、穩重啲好，唔似啲後生仔唔識珍惜。（城城係你杯茶？）我只係欣賞佢。」

其後，記者問到會否催城城與她結婚？她說：「唔知點答。」再問是否與城城拍拖？她想了數秒後答：「冇喎。（點解要諗？）我發吽豆。（有同城城聯絡？）朋友之間聯絡。」又自爆更就「攻城30小時」報道致電對方：「佢都話嚇一跳。（嚇一跳係畀人發現？）唔係。（驚唔驚做小三？）自己一世都冇可能做小三、小四，好抗拒，我問心無愧。」

封嘴避談

另外，昨日有報道指城城因不滿苟芸慧將兩人的短訊四圍揚而提出分手，令她搬回將軍澳，苟芸慧昨日宣傳新劇時說：「咁都畀你哋發現咗？我同經理人商量，成日都返公司拍劇，如果喺西環坐車返工會嘥時間。（話你將短訊周圍畀人睇？）佢都冇傳短訊畀我，點畀人睇？（「攻城」失敗？）我只攻電視城。」而城城昨日到海港城出席慈善活動，提到兩位緋聞女友，他說：「唔答呢啲嘢，唔回應喇！」在記者窮追猛打下，城城發牢騷說：「難得呢段時間單身，以後唔再回應工作以外嘅嘢。（話你推薦葉熙祺拍戲？）唔答喇！」