李亞男獨立 鄭融隨心

當年電視劇《巾幗梟雄》中的「柴九」黎耀祥一句「人生有幾多個十年」成為港人金句，今日王祖藍女友李亞男則親身示範「十年人事幾番新」。在上海出生的她，十歲時舉家移民加拿大生活，十年後再定居香港，參選華姐躋身香港電視圈，並遇上男友王祖藍，生活幸福又美滿。

李亞男半個成長階段都在加拿大，自然充滿加拿大「氣息」，難怪甫出道便被冠以「鬼妹仔」之名，她亦對此稱呼非常受落，她說：「大家叫我『鬼妹仔』我好受o架！不過都會解釋番其實唔係喺加拿大出世，叫我『鬼妹仔』OK，不過我都唔知叫我『CBC』（Canadian born Chinese）啱唔啱。」

自信直插谷底

自言「鬼唔晒」的亞男，原來初出道時因廣東話不流利而令自信直插谷底，即使到現在仍經常擔心咬字不夠正確：「頭一兩年真係好難捱，因為我從來冇學過廣東話，惟有買粵語字典努力學，不過因為工作需要，逼住要好快學識，當時又係新人，好怕錯多幾次就再冇演出機會，真係好大壓力，好冇自信。」

面對重重壓力，亞男來港七年終於「學有所成」，做個真真正正的香港人，她說：「我今年終於攞到香港身份證喇！其實一啲都冇後悔過嚟香港，反而呢七年時間我有好多得着。以前喺加拿大，屋企人當我好似公主咁，又唔畀我出街，又會好保護我，不過嚟咗香港之後，我終於可以靠自己能力工作，學識咗獨立生活，所以呢七年我都好滿意。」

祖藍悉心教導

雖然不諳廣東話而一度搞到零自信，不過另一邊廂，「學中文」卻間接促成亞男與祖藍的美事，她更大爆祖藍「教中文為名，追女為實」，她說：「嗰時大家都係教友，佢知道我要學中文，就好熱心咁教我。嗰時我哋會喺TVB Book間房，之後就單對單咁學中文，不過當時一心以為佢幫朋友，都唔知原來佢係追緊我！到之後大家約多咗，短訊Send多咗，我先開始意識到佢嘅追求。」

後記：蝦碌爆笑

經過七年的洗禮，李亞男廣東話進步神速，全靠祖藍貼身又貼心的教導，不過仍偶有不少蝦碌時刻，例如在訪問時，她將「船到橋頭自然直」講成「橋到船頭自然直」，「收放自如」又講成「收縮自如」，總之笑料盡出，她更貫徹其「鬼妹仔」性格，統統一笑置之，還不斷追問自己的廣東話如何。

鄭融入行十年都被冠以「鬼妹仔」稱號，回望那個還未踏入二字頭、初出道的鄭融，嬌滴滴身形配以23吋小蠻腰，還以惹火的身材嶄露頭角，其後幾乎張張專輯都有幾首跳舞快歌作主打，加上她帶有鬼味口音，「鬼妹仔」的稱號對她猶如度身訂造。不過鄭融對這個稱號卻晒頭，更笑言並不是ABC，她說：「其實我未去過外國讀書，我真係唔知喎！」

既然不知「鬼妹仔」是如何煉成，鄭融當然也想尋根究柢：「係咪因為我初入行嗰幾年比較陽光，好鍾意大自然、沙灘等戶外活動，游水、行山、跑步，好鍾意Outdoor。加上我有時會着涼鞋、背心、牛仔褲同戴太陽眼鏡，可能咁就畀傳媒有呢種感覺，不過我對呢個稱號唔係好介意，可能佢哋都想話我係陽光啲、開朗啲！」

備受批評困擾

雖然鄭融是「偽鬼妹仔」，但直率性格，喜怒哀樂經常放在面上，難怪多次被指黑面。面對種種批評，她也大感頭痛，入行初期更因而感到困擾：「我性格比較隨心，好多嘢都冇乜所謂，當有報道對我出現咗啲睇法時，就會好介意人哋點睇我，有時會覺得我又冇傷害人，點解個結果會係咁？慢慢我就學識，盡量將人哋對我嘅態度睇得輕同正面啲！」

當男友BB

自此，鄭融學懂不會只以自己感受行先，為抽出更多時間陪伴身邊人加強溝通免誤會，她更花盡心思：「我會盡早安排好自己嘅工作，同公司夾好，即使唔係拍拖，私人時間都要畀家人同朋友，每件事都要攞到一個平衡點！我好鍾意所有嘢都排好晒，因為當有私人時間時，我就可以將工作擺低一陣。」

正因鄭融更懂得去愛人，即使跟外籍男友遙距談情，她也對感情充滿信心，更沒要求結婚去箍緊男友，反而只笑笑口說：「隨緣啦！」不過提到相處之道，她坦言會當正男友「BB」，教他牙牙學語：「雖然平時冇乜時間教佢廣東話，但都會教佢最基本嘅字句，好似人哋啱啱學講嘢嗰啲咁，又向佢介紹啲傳統中國節日。」

後記：

鄭融雖然鬼味甚濃，不過並不像一般鬼妹仔說話一輪嘴，反而每次談話前，她都會停一停、諗一諗，經過深思熟慮後才回答！也許，鄭融在娛樂圈所經歷的十年，已教她看盡四季，每次想踏前一步，心中也有一盞紅綠燈叫她停下來，想清楚才行動。