林峯子珊輸得唔抵

視帝視后賽前大熱林峯及徐子珊臨門一腳遇滑鐵盧，令不少人大跌眼鏡！可幸子珊都執到個「安慰獎」，還High爆與粉絲狂歡；反而「親生仔」林峯慘食白果，無綫更接獲多宗不滿視帝視后賽果的投訴，未知是否粉絲為偶像抱不平？

前晚舉行的無綫《萬千星輝頒獎典禮2012》14個獎項已塵埃落定，相信最令人驚奇的就是賽前煲到穩坐視帝視后之位的林峯及徐子珊，最後竟雙雙落敗，取而代之的是黎耀祥及楊怡。這對《雷霆掃毒》拍檔今趟爭獎失敗，劇情比無綫劇集更峰迴路轉，有市民對此「結局」感到失望，無綫共接63宗投訴，其中24宗不滿視帝賽果、10宗不滿視后賽果、9宗不滿最佳劇集賽果。而通訊局昨日亦收到110宗投訴，除指賽果不公外，又指不滿無綫未有公開所有投票結果。

High爆衝出馬路

所謂輸獎唔輸陣，「8號仔女」林峯及子珊在頒獎禮後各自貢獻五位數假灣仔「慶功」，無綫高層樂易玲、梁家樹、林峯堂妹林夏薇及「飛躍進步女藝員」黃智雯都有畀面撐場。換了白色恤衫及牛仔褲的子珊離開將軍澳電視城時獲半百粉絲舉牌吶喊助威，慶祝勇奪「我最喜愛的電視女角色」，她還High爆攞住八個「8號」紫色氫氣球衝出馬路放上天，寓意往後事業「升起」，有粉絲送上用Lego砌出來的街道模型，其中有結婚公仔，問到何時有結婚打算？她說：「好快o架喇！不過唔知幾時！」

慶功宴上，子珊再三重申沒有因失落視后而不快，她說：「盡咗力，無愧於心，之前拉票都拉到凌晨兩點。」對於有網友不滿楊怡攞視后，她盡顯大將之風地說：「今次係全民投票，代表觀眾自己嘅立場，賽果實有人鍾意、有人唔鍾意，大家唔使太激動！」

食白果感失望

對於頒獎禮當晚，被指坐在楊怡隔籬卻零交流，子珊表示對方有遞上暖包，大家不要太敏感。好拍檔林峯痛失視帝，她笑言將她的獎項斬一半予對方：「我有投佢票，佢好堅強，之後仲有咁多年，大家一齊努力！」

至於林峯在頒獎禮上宣布視帝一刻，已知與獎座無緣，顯得一臉失落。對於飲恨視帝，他坦言有少少失望，因為未能上台感謝投票給他的人，又指原本想叫頒獎嘉賓葉德嫻去欣賞其演唱會，對於被葉德嫻讚靚仔，他說：「我想話畀佢知其實我係實力派！我候選咗咁多年，今次都係平常心，祥仔係我尊重嘅前輩，遺憾冇合作過。」之後他要返內地工作，稍後再排練演唱會。原來後日就是黃智雯30歲生日，眾星齊齊切蛋糕慶祝，她表示得獎後要更加努力。