達明變MJ賀李璨琛

繼杜德偉及「盈樂」後，昨日37歲的李璨琛與圈外女友拉埋天窗！二人於酒店筵開39席，星光熠熠，早前患癌的張達明精神奕奕到賀，而劉浩龍聞女友容祖兒即詐傻扮懵兼「超」記者！

藝人李璨琛（Sam）與圈外女友梁志瑩（Pae）昨午於酒店註冊結婚，晚上則筵開39席大宴親朋，陳奕迅夫婦、張達明、劉浩龍、馮德倫、吳彥祖夫婦及「婚宴鐵腳」曾志偉等均畀面到賀。早前患癌暴瘦的「龍咁威」兄弟達明獨自出現，身穿Tee加外套的他精神飽滿，甫現身即舉手擺MJ（米高積遜）甫士，惹起哄動，逗留15分鐘便離開，問到身體如何？略有發胖的他說：「我身體OK，今日偷走出嚟賀琛仔，不過留低食飯就唔係咁好！」他大讚新郎靚仔：「見佢結婚我好欣慰！」至於劉浩龍也獨自現身，問到為何不見女友容祖兒？他竟爆出一聲「超！」又九唔搭八反覆說：「恭喜佢連生貴子，生意興隆，三年抱兩！」之後又扮傻稱「兄弟急Call」便進場。

劉浩龍九唔搭八

晚宴前，一對新人先於昨午會見傳媒，新娘細心為Sam整理煲呔。身穿恤衫西裝的Sam，自嘲造型似牛脷酥：「梳高咗個頭都唔夠老婆高！」新娘則以Pink Lady Look襯兩卡鑽戒上陣。Sam表示前晚二人分別回家上頭後便入住該酒店，昨晨他率領16位兄弟大戰8人姊妹團，開門利是為四、五位數，問到可有被難倒？他說：「冇，不過我同個兄弟兩個人一齊用口剝一條蕉嘅皮，好核突！」

Sam註冊時未有口窒窒，但他自爆淚光閃閃，並笑言緊張到腋下流汗。問到可有讀愛的宣言？一對新人異口同聲說：「唔講！講咗就唔靈！」不過事後Sam透露以《天梯》歌詞作愛的宣言。問到可有送家傳之寶給老婆，他笑說：「我囉！我係一條好好嘅牛脷酥！」一對新人明年元旦到馬爾代夫度蜜月，並計劃兩年後生育。嘉賓方面，他表示請了《怒火街頭》一班兄弟，但部分演員要出埠拍劇而未能出席，他寸爆無綫冇人情味不放人。傍晚6時許，一對新人坐房車在附近「行大運」。

婚宴每席2萬蚊

據知，昨晚菜式連酒水及服務費每圍近2萬元，39席合共78萬元。而菜單則以一篇文章來介紹，包括「黑松露雞蓉燕窩」及「花雕蛋白蒸蟹鉗」等，文中更抵死地指有現金抽獎環節，不過吸煙人士若抽中5秒內不蒲頭即當棄權。席間又播放一段短片，片中一對新人化身卡通人物大跳勁舞。