鄭希怡打牌渡難關

出名「義氣仔女」的鄭希怡（Yumiko），人緣甚佳，與Twins尤為好姊妹。當年她失意時，孖妹即時「做嘢」，陪她打牌及敷Mask解愁，令她非常感動！

我喺呢間公司最開心係識到一班好同事、好朋友，我同祖兒、阿Sa（蔡卓妍）同阿嬌（鍾欣桐）合稱「龍虎豹蛇」，祖兒永遠係我哋嘅姊姊，睇到佢咁多年仲好努力喺舞台上發光發熱，令我好佩服！

我同阿Sa、阿嬌喺呢10年經歷咗好多事，佢哋一直喺我身邊，所以我好珍惜，有幾次我唔開心，其中有次係「東華事件」，阿Sa當年乜都冇講，只係攬實我安慰，仲即刻叫朋友陪我打牌、敷Mask同吹水打發時間，令我感動到眼濕濕！

除咗佢哋，我依家同3T嘅Mandy（蔣雅文）仲有聯絡，反而Maggie（劉思惠）就冇乜聯絡喇！嗰時我同Mandy、阿嬌一齊住，依家Mandy做老闆娘，喺台灣開舖頭。佢性格其實較古怪，喺娛樂圈會好辛苦同蝕底，反而做老闆娘好啱佢，成個人靚晒，依家一係我去台灣搵佢，一係佢喺台灣返港見面。

佩服霆鋒搵命博

男性朋友我都有唔少，其中一個係霆鋒，佢以前係我偶像，我哋合作過《魂魄唔齊》，當年我覺得佢好有型，第一次見佢大嗌：「嘩！霆鋒呀！」其實佢都係「義氣仔女」，佢同Andy（Yumiko未婚夫）係好兄弟，我哋多咗接觸，加上又同公司，所以熟落咗，我覺得佢好搏命，由衷佩服！

（明日待續）

口述：鄭希怡

筆錄：專案組