之前去日本拍劇，喺當地留咗兩星期，好充實。已經有一段時間冇去日本，初頭都有啲擔心，但過關、攞行李都好順利。雖然再去日本，但心理上冇乜太大感覺，但有諗番一啲往事，令我特別珍惜機會。我覺得自己好好彩同好好運，好多人支持自己，包括歌迷、長輩、公司同事同傳媒朋友等，我又冇特別去諗「偶像包袱」，依家心態係想成熟啲，相由心生。可能啲人會將我同衞詩啲際遇比較，但我認為唔需要，佢依家有自己嘅開心方法，加上又係虔誠基督徒，又搵到男朋友，大家應該戥佢高興。
今次去日本沖繩拍劇，其實好難得，完全Focus喺做好每場戲。雖然今年多咗拍戲拍劇，投入演員工作，但我從來冇放棄過歌手身份，嚟緊會出歌，亦會繼續拍戲，幾忙都唔會放棄音樂。我冇厭棄過呢行，不過確實係有放棄過，當年嗰單嘢，令我絕望到有諗過放棄唔做，但後來又唔甘心，加上身邊朋友支持，所以重新出發！
努力儲錢置業
今年收入OK，唔會特別花費，反而儲起佢買樓，希望有機會置業。我已經唔再諗係咪追番失去咗嘅「一年」，只知道現時得到嘅，唔可以用錢計算，好似演出機會、人際關係同感情，比以前更加實在。
（明日待續）
口述：關楚耀
筆錄：專案組
關楚耀早前重臨曾「出事」的日本拍劇，但心情已輕鬆得多。
關楚耀（左二）最近與姜麗文（左一）、蔡穎恩及陳柏宇拍劇，寓工作於娛樂。