高海寧翁嘉穗力撐娘家

「一人一票選港姐」引起軒然大波，港姐出身的高海寧、翁嘉穗齊聲力撐無綫！高海寧昨日與Ar Yu出席活動時說：「呢啲係技術方面問題，Server有事大家都唔想見到，最後用咗個傳統方法解決，港姐不嬲都係評判畀分，評判眼光係準確！」她坦言民意冠軍朱千雪是心水，大讚對方笑容甜美又有大將之風，其後亦識做地讚冠軍張名雅實至名歸。而翁嘉穗曾嘗試投票，問到是否認為被黑客入侵？她說：「TVB發得聲明就一定係！（信有黑客？）係有技術上問題。」並稱無綫是大機構，事前一定有測試：「走漏眼，計唔到！（呃觀眾？）唔係！冇人想，成件事其實都完美，安排得好好。（張名雅做炮灰？）佢哋要學識面對呢啲新聞。」

另外，有個港姐女友陳茵媺（Aimee）的陳豪前晚出席活動，問到認為出爐港姐靚還是女友靚？他識做地說：「梗係Aimee啦！」提到網絡癱瘓，他力撐無綫：「呢個係一個好主意，可以同觀眾有互動，只係技術上預唔到。」