林熹瞳Love成熟蒙面俠

相信每個八十後女生都有看過卡通片《美少女戰士》，甚至幻想自己是其中一分子，儆惡懲奸保護地球！前怪談女主持林熹瞳收藏不少美少女戰士的閃卡和漫畫，誓要棄鬼怪而投入「正義」之師，並尋找屬於她的蒙面俠—成熟型白馬王子！

跟不少八十後女生一樣，林熹瞳（Rachel）非常喜歡看《美少女戰士》系列，更會收藏推出的商品，而她獨愛儲閃卡和漫畫，Rachel說：「我小學四年級左右開始儲o架喇！《美少女戰士》一出同學仔就介紹畀我睇，跟住我就瘋狂愛上！」Rachel外表嬌滴滴，的確跟美少女戰士中的水野亞美有點相似，原來她最喜歡的角色正是亞美：「佢讀書叻，又靚！小學讀書叻好受歡迎o架，唔知點解有呢個風氣，讀書差就畀人排擠，所以久而久之鍾意咗亞美，加上自己當時短頭髮，哈哈，會幻想自己似佢。」

不過Rachel小學成績原來麻麻，跟讀書叻的亞美有段距離，她笑說：「我小學考包尾，中學就考第一，係好大差距，可能小學爸爸媽媽成日唔喺屋企，我冇概念要讀書，後來家姐去咗補習，冇人陪我玩，我惟有讀書。」她又謂小時候性格很含蓄，更懷疑自己自閉：「我唔會同同學傾電話，放學就返屋企，只會同家姐玩公仔玩天光！」Rachel跟姊姊感情要好，彼此還會分享對美少女戰士的感受：「佢鍾意月野兔，我鍾意亞美，但亞美唔係女主角，我就叫佢幫我畫幅畫畀亞美做女主角，但佢通常畫兩張月野兔先畫一張亞美！」

守護「月野兔」姊姊

Rachel還透露姊姊結婚時，她送了美少女戰士物品作賀禮：「月野兔後來變月星公主，我就送咗個月亮水晶心口針畀家姐，佢係月野兔，我就係伴娘亞美守護佢！」她坦言姊姊出嫁後，令她有嫁不出的憂慮：「我鍾意人年紀比較大，思想成熟啲，但年紀大通常已有家室，比較難搵。最大試過同相差十幾廿年嘅男士拍拖，覺得冇代溝啱啱好！又曾經同同年紀嘅人拍拖，諗番好後悔，錯晒！」想不到講起美少女戰士就一臉天真的她，原來偏愛成熟男！

水野亞美攞影后?!

讀演藝學院時，同學仔扮梅艷芳，Rachel竟扮水野亞美，引得同學捧腹大笑，亦展示到她的表演天分：「讀咗5年演藝學院，試過好迷失，搵工先發現自己冇乜專長，除咗做戲。我好想畀人知香港都有好戲之人，希望做到被認同嘅演員。我梗係想做金像獎女主角啦！間中都諗定多謝邊個，哈哈！得個諗字。」她現正跟一家內地公司合作炮製一套魔法卡通片，由她負責撰寫劇本。

自我唯美2D化

喜歡看《美少女戰士》漫畫的Rachel希望透過漫畫世界宣洩情緒：「漫畫世界比較簡單直接，得是非黑白，冇灰色地帶，但現實唔係咁。漫畫中嘅嘢好美化，個個女主角對腳好幼，身材Very Good，所以睇漫畫係畀我幻想有個宣洩嘅地方，令我冇咁辛苦同大壓力。」

靈異閃卡

Rachel大爆手上閃卡是拾回來的：「我細個第六感好強，有日喺屋企做功課，無端端有靈感要行出門口，結果落樓執咗三疊，好神奇！同埋我成日預測到我會撞到朋友，又試過叫爸爸去買六合彩，結果中安慰獎，仲有試過返內地，同媽咪講危險，點知嗰晚真係有車禍！我自己唔鍾意，有日我對天發誓話唔想要呢種能力，之後就唔中喇。」