蔡加怡收4億嫁妝歐遊趕造人

「玩具大王」蔡志明的二千金蔡加怡昨日出閣，下嫁光頭帥哥陳漢驄。蔡志明眼都唔眨豪贈價值近4億元的獨立屋作愛巢，非常闊綽，難怪他將愛女交給女婿時幽默地說：「你執到啦！光頭仔！」

社交圈再添喜事，「玩具大王」蔡志明孻女蔡加怡昨日出閣，與拍拖已久的陳漢驄（Jeremy）拉埋天窗！蔡志明出名豪氣，2007年長女蔡加敏嫁給佳寧娜集團太子馬鴻銘時，他送上半億獨立屋及豪派員工200萬元利是，今次嫁細女更是豪到盡，送上近4億元的萬八呎獨立屋作愛巢，認真大手筆！

萬八呎近娘家

昨晨8時，新郎與兄弟團齊集蔡家九肚山豪宅接新娘，將愛女交給女婿一刻，蔡志明幽默地說：「你執到啦！光頭仔！有個咁好嘅老婆，又靚又叻女！」接過新娘後，一對新人到中文大學崇基學院禮拜堂行禮。除蔡志明及太太蔡李惠莉外，觀禮的還有長女蔡加敏及老公、弟弟蔡加讚與女友汪圓圓等，而男家父母則非常低調，沒有合照。

行禮後，加怡正式成為陳太，蔡志明坦言不捨，問到送上甚麼給愛女，他面不改容地說：「送咗間屋畀佢，係3層嘅，幅地買咗好耐，本來冇諗住送畀加怡，但佢話鍾意咪送畀佢囉！喺我哋屋企隔籬，以後可以成日見到，間屋有萬八呎，市值都要3、4億o架！」而蔡太則送上鑽石首飾及大金豬吊着6隻小金豬的金牌，寓意愈生愈多！

八十席宴親朋

蔡志明又讚女婿一流：「佢大大隻隻，但好斯文，對加怡幾好！」並寄語一對新人互相遷就，至於有否催愛女生BB，他說：「等佢哋自己諗啦！」他透露50年前已認識同樣開廠做生意的親家，雙方十多年沒有見面，現在成了親家可謂緣分。而蔡太亦不捨得愛女出閣：「好在唔係嫁去外國，我尋晚都瞓唔着！」記者笑指他日加讚結婚會更不捨，蔡志明即搶答：「唔同，仔係娶入門！」並透露今次沒有向員工大派利是，只是送禮餅及請食飯。

一對新人昨晚移師會展筵開80席宴親朋，與蔡家長女加敏當年出嫁的180席相比可謂貴精不貴多。身穿名設計師Vera Wang婚紗及晚裝的加怡明艷照人，她說：「真係好開心，終於成為陳太！」談及母親送上金豬牌，問到婚後會否造人，她說：「係有咁嘅意思，但冇畀限期我，順其自然，想二人世界先，我哋蜜月會去歐洲，婚後都會做嘢。」在旁的Jeremy全程眼濕濕，並承諾錫老婆一生一世：「我會永遠錫佢，佢係一個滿分太太！」加怡表示要看丈夫意願，才知他會否幫忙打理家族生意，並笑言媽咪已傳授御夫術。