鍾嘉欣封閉自己：好抑鬱

鍾嘉欣來自充滿愛和溫暖的小康之家，家人的關愛更勝萬金，故她初來港獨自生活時，因思鄉情切加上性格慢熱，長期自我封閉下，幾乎患上抑鬱症！

以前雖然家境一般，但一家人住真係好開心！所以初來香港時真係有思鄉病，好記得有年新年，得我一個喺香港，出新年騷要講到自己好開心，但見人人都同家人開開心心過，唯獨我一個人咁冷清，令我更思念屋企。

我係孻女，人人都以為我一定係得到最好嘅嘢，但我自細冇着過新衫，都係着番家姐哥哥啲衫，但唔代表父母唔錫我。不過其實真係太多衫，所以我都認為唔需要再買，亦唔會問點解唔買畀我，我都覺得自己好變態，哈哈！不過，我唔覺得自己有缺失，其實依家好多父母都係畀最好嘅嘢仔女，令仔女反而唔知咩係「冇」。

母愛無可取代

媽咪真係影響得我好深，雖然媽咪唔喜歡我講佢，但佢真係好叻好偉大！最感動係，媽咪雖然讀書少，唔能夠喺學業方面幫到我，但係佢畀到我嘅愛同關心，係任何嘢都冇得比。自細我跟媽咪跟得最多，所以佢無形中影響到我嘅性格。我喺佢身上學到點樣愛人之外，仲有謹慎同有計劃，令我做咩都諗到好長遠。

正宗緊張大師

不過，我份人就係太謹慎，所以會好容易緊張，甚至過分跳掣，例如我咳得好緊要，一時唔記得戒口食咗件雞，就會覺得好大件事：「死嘞死嘞！點算點算！」

拍《蒲松齡》之前我真係覺得自己好抑鬱，成日都唔開心，陰陰沉沉，連朋友都發覺。我入行頭幾年真係未適應到，咩都收埋唔講，慢慢好似橡筋咁愈扯愈行，雖然有朋友叫我睇心理醫生，但最後我都冇。只要畀我靜落嚟，Reset過就冇事。我有圈中好朋友，但我未必係百分百講晒自己全部嘅嘢，只係對住屋企人我先係無所不談，透明度高達160%！（全文完）

後記：純真傳說

曾聽過鍾嘉欣在圈中朋友不多的說法，其實只要跟她相處過便會明白是甚麼一回事。她有自己的單純世界及想法，比起其他爭名逐利的女星，她簡直談不上是一位女星，而是一個坦白及純真的鄰家女孩，甚麼娛樂圈是大染缸的說法，在她身上根本不成立。

口述：鍾嘉欣　筆錄：專案組