Santino暗寸被利用 趙碩之反擊

《盛女愛作戰》掀起話題，更掀起是非！兩性關係導師Santino早前被拍得接載趙碩之，昨日即暗寸對方放料，而碩之亦句句有骨反擊！

無綫真人騷節目《盛女愛作戰》的兩性關係導師Santino日前被爆教唆學員召妓，隨時觸犯刑事罪！昨日他接受本報獨家專訪時即轉軚︰「當日我係同記者講冇！只係啲學員話夾錢之後叫我夾，唔係我主意，成班人去咗，但我冇上去。」問到會否擔心犯法？他避而不談︰「我唔識法律！」提到舊拍檔Norris的指控，他再三強調沒有做過犯法的事。

「同佢冇乜深仇大恨」

此外，他強調不認識圈中藝人，暗寸載趙碩之時有人放料叫記者跟︰「我唔識趙碩之，只係我個朋友識佢，唔知點解一載佢就有人跟！」對於圈中人的批評，他說︰「圈中人有批評，連香港社會都有批評啦！」

另一邊廂，趙碩之聞Santino暗寸她放料時，即說︰「其實我同女仔朋友走時已經知有人跟，只係我朋友覺得當時冇必要同佢講。我同佢冇乜深仇大恨，但我識Norris，我Feel到佢唔會刻意唱Santino囉！」昨日更有網友把周星馳經典電影片段和對白惡搞Santino成名的「45度」識男仔。

香振強否認戀Suki

另外，有指參賽「盛女」Suki前男友是香港甲一籃球勁旅永倫隊長香振強，並指因男方另結新歡致分手。香振強透過公關公司發表聲明直斥報道失實，會保留法律追究權利。他受訪時指與Suki是同學：「冇追過佢，佢亦冇追過我，同佢最少十年冇見。」他承認有追看《盛》，亦向女友坦承識Suki。有指Suki昨日由台灣返港，大批傳媒守候，但至截稿前仍未見其蹤影。