Kelly 暫時封肚唔追女

樂壇天后陳慧琳（Kelly）細仔劉琛上月出世，昨日滿月，Kelly上載細仔照片到其個人網誌中，大仔蝦餃仔更錫錫細佬！問到會否繼續追女？她說：「呢一刻唔想生住。」

靚媽Kelly上月剖腹誕下細仔「小龍包」劉琛（Riley），昨日小龍包滿月，Kelly在其個人Blog上載滿月禮物的照片，還有她抱着小龍包，大仔劉昇（蝦餃仔）錫細佬的照片，非常溫馨。而Kelly昨日接受查小欣電話訪問時表示，滿月禮物是四個小龍包形的甜品，並透露不會擺百日宴，只跟家人食飯慶祝。問到恨生女的Kelly會否追女？她說：「唔好搞咁多嘢，呢啲天意，呢一刻一定唔想生住，啱啱先復原，又嚟嘅都幾係嘢！（老公呢？）我諗佢呢一刻都唔想生住。」

餵人奶腰骨痛

餵人奶的Kelly坦言並不辛苦：「餵完人奶後都會腰骨痛，要做伸展運動，大約會餵2個月。」提到小龍包較像老公Alex？她說：「似呀呵？但都有少少似蝦餃仔！」她稱現時小龍包重九磅，但因經常睡覺，故很少互動：「佢（小龍包）都算合作，都易湊，但反而蝦餃仔依家識講好多嘢，好玩啲！」Kelly指蝦餃仔已知道榮升哥哥：「因為佢話自己係劉昇哥哥，放學返嚟仲會搵細佬Say Hello，我問佢睇唔睇細佬沖涼，佢又會放低晒手上嘅車仔，話睇細佬Swim。」Kelly身體復原得快，傷口已不痛，亦有在家中做運動收身，但未達最佳狀態。

拒拍激烈床戲

此外，Kelly表示已有新歌派台，是佗着小龍包時所錄，算是產後首項工作，問她可會接拍親熱戲？她說：「都會拍，但唔係喺床度翻雲覆雨嗰啲啩！唔好話兩個仔，我諗我阿媽應該第一個跌落地。」另一樂壇天后楊千嬅亦臨盆在即，問到會否給予意見？Kelly說：「冇喎！實掂！佢以前係護士，知點安胎，佢都幾好，差唔多o架啦，加油！」

另一邊廂，Kelly昨日向圈中人廣發滿月禮物，汪明荃在微博上載禮物照，公開感謝Kelly：「祝福他健健康康，快高長大！更祝福靚媽咪開開心心！」而收到禮物的圈中人包括曾志偉、梁朝偉和劉嘉玲、李克勤、陳奕迅和徐濠縈、楊思琦、導演劉偉強、程小東等。