周志文拒認女友 CoCo咬實唔放

現於上海拍新劇的無綫小花馬賽傳介入「巨聲幫」大孖周志文與模袁聖殷（CoCo）的戀情，昨日馬賽否認是「小三」，周志文更不認CoCo女友身份，CoCo大感愕然：「佢公司唔准佢認！」

馬賽對於捲入周志文與模CoCo的戀情，深感無辜！身在上海拍攝新劇《名媛望族》的她，昨日接受電話訪問時說：「之前一直傳我同志文嘅緋聞已經回應咗，我哋只係拍檔、同事。」有指日前CoCo親到上海監視男友，在商場拍拖時更與馬賽撞到正，馬賽說：「我唔知佢（指CoCo）咩樣，亦唔識佢。（CoCo話唔想提你，嬲唔嬲？）唔想評論人哋，我都唔知佢嚟上海，又冇見過佢。（同周志文開工有冇尷尬？）我哋有開工演對手戲，仲傾番呢件事。」而她亦在微博表示清者自清，心情沒有受影響。

「我問心無愧」

至於「男主角」周志文被指一腳踏兩船，雖然被影到與CoCo翹手行街，但否認拍拖：「我哋只係朋友，識咗八個月，佢嚟上海探親順道搵我。（帶你見家長？）唔係。（送佢去機場？）禮貌啫！」對於CoCo稱男人不睇實就身痕，他說：「我會同佢了解，但依家開工未有時間。（馬賽被拖落水？）唔知點解會咁。」而遭周志文拒認女友身份的CoCo大感愕然，直指男友受公司壓力不可公開戀情：「我知佢公司唔准佢認，人哋公司點管藝人我冇得Comment。我唔識講大話，我問心無愧！」