「上海仔」自爆：最鍾意徐子珊

有「上海仔」之稱的郭永鴻捲入特首選戰風雲，這位新聞人物身份神秘，曾開娛樂公司染指娛樂事業，近日更傳出他曾與藝員梅小惠拍拖！對此小惠親證與「上海仔」識於微時，但「上海仔」否認緋聞之餘，反而自爆：「我最鍾意係徐子珊，不過徐子珊唔鍾意我啫！」

新聞人物「上海仔」郭永鴻身份既神秘又敏感，近日更傳出在旺角長大的他，跟梅小惠不但識於微時，更曾拍拖！本報記者昨日向「上海仔」求證他與梅小惠的緋聞，他大感愕然：「冇！冇追過佢、冇拍過拖！我同梅小惠係好朋友啫！睇住佢大，好細個識！可能兩年前佢有出席我媽媽個喪禮而畀人誤會啦！」

慨嘆神女無夢

問到曾開公司捧賈曉晨（JJ）？「上海仔」說：「都冇緋聞！我以前開過娛樂公司簽過JJ同唐寧，依家都冇搞娛樂公司啦！」他更衝口而出自爆：「其實我最鍾意係徐子珊，不過徐子珊唔鍾意我啫！（你追緊徐子珊？點識o架？）咪講咗囉！我鍾意佢，佢唔鍾意我嘛！哈哈！」他表示雖與圈中人稔熟，但不想講太多。

另一方面，小惠昨日接受本報電話訪問時，不但沒有任何避忌，更大方暢談二人關係。

記：記者　惠：梅小惠

記：有冇同「上海仔」拍過拖？

惠：（語氣堅定）我冇同佢拍過拖！「上海仔」係我好尊敬嘅大哥哥，我哋好細個就識，大家都係住喺旺角，當年佢住樓上，兩家人都好熟。不過，到我11、2歲佢就搬走喇！

記：覺得「上海仔」為人點？

惠：佢係一個好尊敬老人家嘅人，我爸爸未死前一向好幫助隔籬鄰舍，即使「上海仔」住我樓上，我爸爸依然好照顧佢媽媽，可能因為咁，「上海仔」好尊敬我父母，可惜搬走後就少來往！

記：你哋點重聚？

惠：99年，我爸爸病重，「上海仔」一聽到就去醫院探我爸爸，仲留咗一段好長時間！爸爸過身之後，「上海仔」都有去靈堂送佢一程，我媽咪覺得佢好有心！（據知，當時有人在靈堂內看見「上海仔」以一身白色唐裝前來致祭，還有6名黑衣大漢跟隨，極具氣勢。）

喪親互慰互助

記：之後仲有聯絡？

惠：前年「上海仔」媽媽過身，我阿媽好想去拜祭，但因為年紀大，所以叫我同家姐（梅小青）做代表去靈堂幫手摺衣紙。到依家我阿媽去飲荼，有時見到「上海仔」，都係佢請！

記：佢有冇追過你？

惠：Feel唔到喎！我哋平時好少聯絡，即使佢拜我爸爸，我拜佢媽媽都係尊重！

小青：佢好有心

梅小惠不避嫌大談與「上海仔」的一段「舊情」，其姊梅小青接受電話訪問時亦大方說：「我哋係同『上海仔』一齊長大，佢好有心，我阿爸唔喺度時都有到靈堂握住我阿媽隻手慰問！（小惠同佢拍過拖？）以我所知就冇，不過我聽過話佢追小惠，但你知啦！小惠成日都話多人追，唔知真定假！」

娛樂圈廣結人緣

外號「上海仔」的郭永鴻與娛樂圈早有淵源，02年與黎小田等合資在跑馬地開酒吧外，04年與友人開設「星悅藝人管理有限公司」（Joy Star），旗下藝人包括賈曉晨（JJ）及唐寧，不過該公司成立以來沒有大動作，後來JJ於06年轉投陳百祥的「SNAZZ」，唐寧則另簽經理人。據知，「上海仔」在娛樂圈中廣結人緣，有江湖地位，不少電影公司或圈中人遇到麻煩都會找他做中間人。