吳千語開墾 Young險路

近年娛樂圈掀起一股90後新勢力，不少新星於各路崛起！現年18歲的「少女版楊采妮」吳千語甫出道即在電影擔正，與多位型男於大銀幕鬥戲，這條濃縮上位的演藝路，她恍如發夢一樣，令人生變得不平凡

年僅18歲的「少女版楊采妮」吳千語（Karena）初拍電影便擔正做女主角，模特兒出身的她搖身一變，成為電影公司力捧的新星，回想當日試鏡，也許是愛挑戰的性格，令她成功踏上大銀幕︰「我性格想突破自己，試有挑戰性嘅嘢，所以我細個會玩跳傘，人生咩都要試吓，唔好畀自己後悔！」

能在大銀幕中看到自己的演出，Karena直言恍如一場夢，改變了她的人生︰「由17到18歲嘅變化好大，一年前冇諗過人生會係咁，冇計劃拍電影，仲係女主角。以前做Model為咗消磨時間，諗住讀完書搵份鍾意嘅文職，但拍戲後鍾意咗做戲，好充實同新鮮！」

貴人扶持．清者自清

大部分人覺得娛樂圈是一個大染缸，Karena的家人亦受報章的負面報道影響，擔心她會學壞，Karena說︰「未簽約拍《開心魔法》前諗咗兩個月，雖然想試，但要諗吓點樣話畀屋企人知。以前做Model佢哋都唔係好鍾意，覺得呢行太多負面嘢，怕我都會變成咁。不過我清楚自己入行係想做乜，向佢哋承諾唔會變壞！」

成功說服家人後，Karena正式簽約接拍處女作，壓力開始湧現︰「初頭有啲驚，會問點解用新人，我又唔識做戲，但劇組叫我唔使擔心，加上有導演教我，知我係新人，要求唔係最高，成個劇組由頭到尾都冇鬧過我！」但她極速上位擔正，難免令外界揣測，Karena說︰「之前喺內地做宣傳，有人問我係咪有內情，一定冇！只係導演要求用新人。」面對質疑，Karena勝在EQ高，不會把別人的說話放在心上，她說︰「我唔會唔開心，識我嘅人都知個事實係點，佢哋叫我唔好介意！」

提升實力．謝絕愛情

這次機會令Karena人氣急升，但她未敢自滿︰「我認為天生做戲勁外，作品多人鍾意，運氣都好緊要。」對於被網友封為「新一代宅男女神」，她感到非常愕然︰「個個都想多人鍾意，但唔想只係得宅男粉絲，希望多人覺得我係OK！成功嘅藝人係要多人捧場嘅。」Karena不想只是靠樣搵食，誓要做實力派演員︰「希望有代表作，但唔急嘅，好多方面都要努力！」

年紀輕輕的Karena，事業已快人一步，但正值情竇初開之時，感情卻一片空白，她笑說︰「我有拍過拖，依家就物色緊。識朋友好正常，但唔可以去到咁盡，依家事業啱啱開始，唔想影響工作，但一大班朋友出街去玩去放鬆吓，當然冇問題。」

後記：小「妮」子盼見正版

Karena因與楊采妮相似被封「少女版楊采妮」，提到這個稱號，她十分受落︰「我唔介意，之前睇報道話我似佢，佢咁靚女喎，當然好啦！」她更希望與「正版」見面︰「我未見過佢，想同佢合作，希望有機會一齊做嘢啦！」