任達華：佢唔識溝通

自小與父親缺乏溝通的任達華，坦言當警察的父親經常體罰他，而父親在他14歲時已殉職，故已為人父的華哥，會爭取時間跟7歲的女兒相處，藉以獻出更多父愛，亦找回童真。

口述：任達華　筆錄：名人組

細個嗰時，老竇打我邊有理由o架？佢對我好嚴，但問題就係，佢唔知點同我溝通嘛！咪用打嚟同我溝通囉！我細個梗係驚佢啦！一返嚟仲唔驚佢呀？點知佢幾時打我o架？但係慢慢長大咗，明白原來佢只係唔識溝通方法，嗰個年代父母唔識溝通，因為日日要返工，老竇又冇讀過咩大學或者有其他學歷。

所以依家我會花好多時間同個女溝通， 係呀，我哋仲會WhatsApp添呀！佢自己有iPhone啦！好似我返內地工作，佢會WhatsApp同我講：「Why did you go to China？」哈哈，我又唔會好似某啲家長咁，唔想個女大得太快，永遠都細個可愛，因為成長係必然嘅事。我個女好甜o架！嗱，雖然電腦通訊發達，但肯同佢玩係好重要，我一定抽時間返屋企一家人食飯，除非有咩突發事返唔到。我細個經歷60年代一個發展，好似《歲月神偷》嗰個年代咁，現代通訊話就話可以令我哋零距離，但實際人與人之間係冷漠咗，冇咗語言去溝通，一切都係商業行先，世界變得好冷漠，如果喺呢個商業社會，同個女逢禮拜六食餐飯，我會搵番童真。

陪游水好慘

我成日同佢游水，好慘o架！佢每隔兩個鐘就攬實我，哈哈，佢好黐我，兩公婆佢都黐，一瞓覺就嗌媽咪媽咪。不過佢最鍾意都係婆婆，錫婆婆錫到燶呀，求婆婆同佢瞓，因為佢哋日日一齊，有乜事就攬住婆婆，有乜都分畀婆婆食先，見到小朋友咁又好開心，因為佢懂得分享。個女係好典型女仔嘅女仔，佢唔多嘢講，斯斯文文咁，但知你做緊乜，女仔咁係好，溫文啲，佢都鍾意運動，有時會同佢喺屋企跳繩，比起同齡小朋友，佢屬於高大o架，唔好似姚明咁高大就得啦！哈哈。（全文完）

後記：

小孩子的可愛之處是有童真，不矯揉造作，訪問過程中，華哥亦常提及要尋回「童真」兩個字，因為人夠真才會舒服。今次的訪問地點是在露天進行，所以很多遊人認出華哥，但華哥都會逐一跟他們打招呼，現場風勢很大，他亦從沒半句怨言，更主動跟筆者分享家庭照，可見華哥的童真其實從未失去過。