Carol爆王宗堯私密：佢鍾意拗數

楊梓瑤（Carol）雖不算緋聞女王，但先後與大隻仔羅仲謙及陳靜舊愛王宗堯（Greg）傳緋聞，Carol強調與Greg是「好好朋友」，又幫對方澄清絕非花弗男。

入行至今，我嘅緋聞唔多，戀情十隻手指都數得晒，講到愛情觀，就係唔會主動追男仔，鍾意被動多啲，但冇話邊個鍾意邊個多啲，我唔介意付出，但希望「收入」成正比。細個已經識織頸巾同煮嘢食，最叻煲青紅蘿蔔湯，以前啲男友都鍾意食嘢，雖然自己唔好甜品，但都會整畀佢哋食，我鍾意佢哋欣賞我嘅廚藝，唔介意做模範「煮」婦，但就懶洗碗。

否認主動追求

每個人都會經歷分手，讀書時明明自己嗌分手，但又喊足一兩個月，好變態！同對上嗰個男友係喺平靜環境下分開，就算我啲同事都唔知嗰時我哋散咗，因為當時應承自己，唔會畀感情事影響工作同學業。呢排成日傳我同王宗堯拍拖，同佢只係好好朋友，識咗年幾，我冇追佢，不過啲人話佢花弗，我要幫佢澄清，佢係一個幾好嘅男仔，雖然初時都會覺得佢幾花弗，好似Playboy，但熟落之後，佢原來有風度、有耐性，同埋都幾宅男，鍾意玩足球Game同打拳，佢仲鍾意拗數，即係當我同佢各有觀點時，佢就好鍾意同你拗。

接受圈中男友

雖然我哋畀人影過一齊出街，但唔會因為咁有咩避忌，男未婚女未嫁，佢都係一個唔錯嘅男仔，總之我哋喺鏡頭以外，都會有正常嘅社交生活。

如果問我抗唔抗拒同圈中人拍拖，以前就會，因為呢行太花花世界，男藝人身邊太多誘惑，不過依家可以考慮，因為話晒同行，對方會明白我嘅工作模式，唔使下下解釋點解要咁做？不過自己就唔太接受姊弟戀，對方一定要大過我，就算大十五年都OK，唔會驚畀人話有「戀父結」！

（明日待續）

口述：楊梓瑤

筆錄：專案組