輸家法拉被揭讓獎天華苦笑速閃

無綫台慶頒獎禮前晚揭盅，視帝、視后鄭嘉穎及胡杏兒攞獎攞到手軟，而賽前大熱謝天華及陳法拉則雙雙捧蛋！天華獲高層樂易玲擁抱安慰後即急撇返家，並苦笑說：「我尊重體育精神！」而法拉則在微博自我安慰，並呼籲Fans不要加入罵戰！

現年44歲的謝天華，憑劇集《潛行狙擊》中的「Laughing哥」角逐視帝慘敗，劇中女友「Madam Jo」陳法拉亦食白果，事後無綫接獲9宗投訴撐天華。頒獎禮結束後，天華連訪問亦冇做便登上保母Van飛車返家，抵達跑馬地寓所時，拿着兩袋衫的他苦笑說：「聽日開早所以走先。（有冇失望？有冇唔開心？）冇，我尊重體育精神！」而他昨日接受電台訪問時表示，已在微博安慰Fans，問到有否向高層樂易玲了解，他說：「了解咩？其實樂小姐出咗好多力，我心知，唔使乜嘢都檢討。」

老婆消夜安慰

昨日，天華偕法拉出席天梭錶旺角新店開幕，吸引不少Fans舉牌吶喊，他強顏歡笑接受訪問，最初強調冇不快：「今年攞唔到咪出年囉！嚟緊仲有咁多年，要學Laughing嘅『打不死』精神。」再問到有否失望，他才說：「每個人都會有呢個時刻，但要盡快回復心情，唔可以沮喪。（大熱倒灶？）比賽一定有出眾嘅人，最後只有冠軍，咁第二、第三唔通又唔開心？」對於被網民封「白果王」，他大方說：「唔介意，呢個劇攞咗最佳劇集，我都算攞咗1/40個獎。（太太有冇唔開心？）佢主要睇我反應，我表現冇唔開心，佢又點會唔開心？」並自爆前晚返家後獲老婆煮消夜。

促Fans息干戈

而法拉亦揚言沒有失望：「幾百人之中入到5強已算獲肯定，好開心。（演技唔及杏兒？）唔同劇冇得比較，之前我同天華攞情侶獎，深入民心，拍電影又有續集，好有得着。（男友安慰？）我都冇事，好多朋友傳短訊讚我條裙靚。」對於各派Fans在網上互罵，她在微博表示每個得獎者的感言都很激動，呼籲Fans不要比較，正面支持各自所愛。此外，有指她因不滿楊怡做第一女主角而辭演新劇，由港姐朱晨麗頂上，法拉說：「我好希望同楊怡合作，只係身體重要，我要返美國屋企休養。」至於會否出席「未來妯娌」諸葛紫岐的婚禮，她說：「等佢公布咗先啦！」

至於無綫高層樂易玲昨日出席無綫活動時透露，賽後曾擁抱天華安慰：「我叫佢唔好氣餒，佢話冇唔開心。（有冇喊？）Laughing Sir喎！一定可以承受得起。」對於法拉同樣食白果，她說：「佢自己話唔想攞住，佢話未Ready。」此外，談及楊思琦大肚請假及解約的傳聞，她表示不知道對方結婚，但否認解約。