周秀娜 向「小三」傅穎道歉

性感女神周秀娜（Chrissie）盛傳因男友陳偉成（Avis）車載傅穎（Theresa）鬧出緋聞而氣頂！感情現危機令Avis急急補鑊，結果日前發現Chrissie終於原諒他，讓男友貼身侍候食消夜，Chrissie更主動致電被傳是「小三」的Theresa，不過並非跟她講數，反而是跟她道歉！

自傳出Chrissie男友Avis趁她不在港時接載Theresa後，便傳出Chrissie大感冇面氣難下，而與男友現感情破裂，提起男友表現冷淡！據悉，Avis為令女友降火，不但主動澄清與Theresa「冇嘢」外，更連番出招氹女友，日前Avis終於氹掂女友，貼身陪伴她四圍去，兩人到大坑歎日本菜至凌晨時分，Avis離開餐廳時更怕娜姐走失似的，娜姐行快兩步他即急急腳趨前。

感情重修舊好，昨日Chrissie穿上性感Deep V裝現身Play Station Vita香港發布會，提起與男友和好如初，她說：「拍拖都係咁，有熱戀期、冷靜期，依家係平淡期。」問到會否擔心離港兩個月拍劇會沖淡感情？她笑說：「要搵激情，或者走時搵佢打麻辣火鍋！」

叫男友打雀解悶

至於前晚Chrissie出席另一個活動時表示，與男友「未散」：「間中有食吓飯。（搬走咗？）不嬲同屋企人住。（冷戰關傅穎事？）不嬲唔關佢事，唔知點解新聞扯落佢度。」話雖如此，她卻坦言會利用北上拍劇冷靜吓。問她不在港時，男友會否找「雀仔」按摩？她開玩笑說：「咁鍾意雀仔，打牌好啲，有四隻雀。」

此外，Chrissie當眾為傳是「小三」的Theresa澄清，更主動致電對方道歉！昨日本報記者致電Theresa，她開心地說：「多謝佢幫我澄清，講番事實出嚟，其實前幾日佢已經私下有打電話同Whatsapp我講唔好意思，覺得唔好意思拉咗我落水，大家同一行，都明白係咩一回事。之前個報道出咗嚟話我係第三者，我都感到好無奈，加上件事唔係真，佢同我講唔好意思就算！不過，都希望佢同男朋友快啲冇事。」她再次強調當日只是帶寵物倉鼠去睇獸醫，遇到Chrissie男友打招呼而已，連Avis的座駕都未有見到，更沒有坐上其座駕，對於被傳坐Avis車，大感無辜。

Chrissie Vs Theresa

周秀娜（Chrissie）

年齡：26歲

三圍：32D、23、33

身高：170cm

簡介：09年推出處女寫真《Kissy Chrissie》走紅，近年轉戰影壇，在《婚前試愛》、《熱浪球愛戰》及《喜愛夜蒲》等擔正，在《婚》片中有性感出位戲。

傅穎（Theresa）

年齡：27歲

三圍：32B、23、33

身高：167cm

簡介：02年成為Cookies成員，05年Cookies宣布作個人發展，傅穎以拍戲及廣告為主，參演《戀愛初歌》及《熱浪球愛戰》等。