謝安琪堅信日久見人心

謝安琪（Kay）出道不久即緋聞、是非纏身，面對一籮籮負面新聞，她一直保持平和及禮貌，直到炒作新聞愈來愈離譜，Kay開始發現與部分傳媒有「火藥味」，令她感到吃力及困惑，她坦言很難討好每一個人，相信日久見人心。

口述：謝安琪　筆錄：音樂組

我同傳媒一開始係一個好好嘅蜜月期，到我出第二隻碟，都係靠佢哋口碑幫我傳出去，其實我好感謝傳媒，到結婚、生小朋友新聞多，愈來愈多人認識我，大家多咗接觸同衝突，我一路都冇乜點變，心態都係一樣，抱住平和心態，我唔係好主動諗好多嘢搞新聞嘅人，唔識諗題材，我好老實，你問咩我咪答囉！一直都相安無事，係一啲雜誌寫啲嘢愈來愈負面，往往負面嘢好難回應，加上我又唔覺得要回應，只不過生安白造嘢多，誇張嘢又多，會變咗大家坐低見到我嘅話題開始有火藥味，問親都係難聽嘢，又要我答，大家相處開始有啲困難。

極端分子刁難

當負面新聞多就形成一種誤解，開始發現有身邊人受呢啲新聞影響，有段時期好大壓力，連身邊識咗好耐嘅朋友都會畀負面新聞動搖，唔通呢個人紅咗，就會有呢啲古靈精怪？態度唔好，熟朋友都有一刻動搖，何況唔識我嘅人呢！我好明白，我深深感受到呢啲壓力同傷害，我個人冇變但有邊個知？但嗰啲人不停講我變咗！當呢啲反彈力成日反彈嚟傷害我嘅時候，開始形成工作好大壓力，我一路都冇改變，回答到嘅咪回答囉！好難堪嘅問題唔想答，我都好禮貌話唔好意思唔想答，大家只不過係道聽途說以為我個人唔好，原來啲嘢積埋積埋係會成真，我愈來愈吃力、好辛苦，我都係抱住個心態，唔想同任何人過唔去，想工作係開心，所以我覺得被動嘅性格令我蝕底。

大部分傳媒係按本子辦事，做佢哋要做嘅嘢！有個別例子好極端，的確故意態度唔好，講嘅說話難聽，或者採訪方法好唔客氣，但我反應盡量禮貌，就算我唔想做咁唔禮貌訪問，都好禮貌咁推，我覺得我盡咗能力去做，和平地方都會發生戰爭，我好努力去做好音樂，覺得好歌有好報，但係娛樂世界的確令我好難配合，呢個世界嘅人好多時係靠主觀角度批評或論斷你，所以唔需要太介懷人哋誤會。當大家了解我多咗！作嘅位又少咗，亦都畀到我信心，點解我覺得同傳媒關係會慢慢好，久而久之我唔需要憂慮咁多嘢？因為隨住時間，觀眾、傳媒、讀者對於我認識多咗，我成日相信時間會證明一切，係有佢嘅道理，真係日久見人心。（明日待續）