奪雲山聰：未諗住結婚

無綫藝員陳山聰奪得賭王何鴻燊千金何超雲的芳心，前晚到三太家作客心情緊張，幸與賭王及三太相處融洽，順利再過關！山聰昨日接受本報訪問時表示，相信靠心思打動超雲，亦早預了外界多閒言閒語，但講到談婚論嫁，他說：「大家未諗住結婚！」

聰：陳山聰　記：記者

追求超雲：話唔難就好驚

儘管身份懸殊，但藝人出身的山聰如何在彈指之間，把超雲這位賭王千金芳心手到拿來？山聰娓娓道來。

記：超雲公開情侶關係後，好多人恭喜你？

聰：係太多人打電話畀我，我都冇聽電話，因為好攰！

記：有冇承諾畀超雲？

聰：畀心機做嘢就係對佢最好嘅承諾！

記：外界經常將你哋嘅身份作比較，形容係女尊男卑？

聰：外面有好多唔同聲音，我哋唔會理，我哋都單身，背景唔同一早知，喺得埋一齊就唔會理會太多！

記：有冇諗過娶超雲？

聰：（笑）大家未諗住結婚，談緊戀愛！

記：你曾經離婚，會唔會對你哋呢段感情造成障礙？

聰：以前嘅事都過咗去，今次係新開始！

記：賭王同三太知唔知你曾經離婚？

聰：應該知，報紙都有寫，同埋超雲都有同佢哋講，我冇過問，唔想受過去嘅事影響！

「留意佢鍾意乜」

記：同超雲發展你有冇信心？

聰：我哋剛剛開始，畀啲空間了解，我係有信心嘅，希望舒舒服服咁正常拍拖，食飯睇吓戲。

記：嚟緊9月你要開劇，到時要做嘢冷落女友？

聰：唔會，為做嘢佢會明白，會適應！

記：有冇規定每日要打幾多個電話同短訊？

聰：啱啱拍拖一定會打電話同發訊息，好自然！

記：其實你係點追超雲？

聰：（開心地笑）吓！可唔可以唔講，冇刻意！

記：超雲係咪好難追？

聰：難，點會唔難？話唔難就好驚！

記：你用乜方法氹超雲？送花？

聰：每個女仔都鍾意，做啲令佢開心嘅嘢囉！

記：令超雲開心容唔容易？

聰：難，要估！平時佢講嘢可能漏兩句，留意佢鍾意乜。佢乜都鍾意！（最鍾意心思？）係，我哋都鍾意時裝，送過耳環同頸鏈。

夜會賭王：佢有睇我套劇

能昂首以超雲男友身份、踏入三太陳婉珍的布力徑大宅，與賭王、三太及超蓮共進晚餐，山聰坦言第一次跟賭王食飯緊張到震！

記：昨晚（前晚）係咪第一次同賭王食飯？

聰：係第一次食飯，其實之前都見過一次，嗰次喺何生屋企，大家都係Say Hi見吓面，但食飯就第一次，所以我好緊張！

記：你同賭王有冇傾偈？

聰：有傾偈，佢好好人。

記：賭王有冇叫你要錫住超雲？

聰：冇提及，佢有問我做嘢嘅嘢，佢之前都有睇我演皇帝嗰部《洪武三十二》。

記：賭王讚你演得好？

聰：（開心地笑）冇講，不過有問起個皇帝幾多歲。

記：仲有冇傾啲乜？

聰：後尾大家影咗張相，何生就休息，唔想打擾佢。

記：三太都係第二次見？

聰：係。

否認三太嫌棄

記：有部分傳媒話三太唔鍾意你？

聰：傳聞啫！Auntie都有叫去食飯，就知嗰啲所謂嘅傳聞唔係真。

記：超雲公開你哋嘅關係，係咪鬆咗一口氣？

聰：冇話鬆口氣，真正拍拖，唔想影響太多人，我哋大家有共識傾咗好耐，佢屋企人都畀咗意見，大家OK先公開。

記：外界都稱呼你做賭王未來女婿，你點睇？

聰：唔好咁講，拍拖啫！一段愛情，一段關係，大家誇張咗！拍拖就拍拖，唔諗咁多，依家淨係諗做嘢，遲啲拍添哥（李添勝）部新劇，要收拾心情，遲啲要聽劇本！

公開經濟：正常夠我生活

要跟超雲比身家，實對山聰欠公允。在陪伴超雲歐遊期間，有傳山聰仍拖旅行社4萬元機票錢，山聰逐點反駁。

記：超雲話你中間有段時間返咗香港，究竟去咗邊？

聰：我返咗上海足足1個月，因為屋企有事，乜嘢事就唔講得，後尾知佢要返香港，所以飛過去倫敦陪佢一齊返香港！

記：你冇工作咁耐咪冇收入？

聰：唔會，無綫有出糧，可能請假會扣錢，但我Check過戶口冇扣到錢，可能因為之前我都儲咗好多假仲未放。

記：之前有指你欠交旅行社4萬幾蚊嘅機票錢未找數？

聰：（突然嚴肅起來）呢樣我要澄清！當日我係託朋友搵旅遊公司訂機票，我一早畀晒錢個朋友，點知個朋友最近先找數，我唔會為幾萬蚊走數，講都冇人信！

澄清冇走過數

記：你朋友點解遲咗找數？

聰：佢病咗入院。（話你走數唔開心？）好唔開心，因為唔係我直接訂，唔查清楚就周圍好似貼街招，要搵我唔難，我覺得佢哋專業操守有問題！

記：你依家財政狀況如何？

聰：正常，夠我生活，澳門哥哥公司有錢出畀我。

記：照顧女友都唔成問題？

聰：我淨係買啲小禮物，佢又冇叫我買鑽石。

記：諗住賺幾多錢先會結婚？

聰：冇諗，我哋覺得唔應該用金錢衡量，如果大家係介意錢，就唔可能喺埋一齊！兩個有共識，拍拖就拍拖，唔關錢事！好多人都話我貪錢，我同我屋企人知唔係就得，將來感情有問題亦一定唔關錢嘅問題！