小肥升呢配角變主角
歌手小肥（徐智勇）入行至今拍過多部電影，但多以群戲為主，未能盡情發揮，他說：「我之前啲作品都係群戲為主，一大班年輕人一齊演出，我哋叫做『天神村』！」不過，在新片《戀夏戀夏戀戀下》中，小肥以男主角身份配方力申和敖犬一同演出，他直言多了發揮機會，感激黃柏高賞識，日後會把握電影演出機會。
《戀》片中，小肥飾演一名隱形富豪，單靠外表不受女士歡迎，問到現實中他是否同樣不獲異性歡心？他無奈地說：「唔係o架！新結識嘅異性大部分都會話我可愛，但唔係話有發展嗰啲囉！其實有人讚可愛都幾好，最少唔係第一眼就畀人拒絕先吖！都係一種讚賞。」問到與劉羽琦合作的感覺如何？他直言對方爽朗熱情：「我都有盡地主之誼帶佢喺香港食飯，我覺得佢份人好玩得、好爽，有時仲搭住膊頭講嘢，好似兩兄弟咁囉，好熱情！」
小肥多了發揮演技的機會，當然會好好把握！