楊丞琳涼鞋別致 9分
評語：「Casual Chic，着出悠閒舒服感覺，最別致係對涼鞋，點綴出簡單時尚風格！頂帽嘅黑邊同鞋畫龍點睛，好適合個短髮。」
Amanda S.紅白配 9分
評語：「白背心襯灰裙，感覺雪白漂亮，令皮膚紅粉緋緋，襯紅鞋都可以，但配合今季潮流，粉紅色更好！」
衞蘭簡單有型 7分
評語：「配搭簡單有型，衰在有雙下巴！幾鍾意件西裝褸，不過條褲要長啲，換對顏色鮮艷嘅Two Tone鞋仲更突出！」
Lou Doillon後生時尚 7分
評語：「呢位法國女星着得幾好，長金髮襯珠片裙，好後生同時尚！美中不足係對鞋，應該襯裸色或泥啡色船踭鞋！」
江若琳標準玉女 5分
評語：「好標準嘅靚女吊帶裙，穩穩陣陣，一貫玉女風格！想潮啲可以戴Chunky飾物，髮型梳中間分界。」
陳嘉寶毫無星味 4分
評語：「黑白配似學生妹，完全冇星味可言！上身好鬆，着埋傘裙令全身好肥，寧願佢着條連身白裙，多扣嘅鞋太Heavy，啱冬天多啲！」
林莉黑撞綠 4分
評語：「就算佢骨架標準，着出嚟都好斯文，冇潮嘅感覺！對鞋又出事，想型啲可以加Leggings，再襯對好多帶嘅高踭鞋。」
沈卓盈裸色系 3分
評語：「條裙好蝦人着，着到佢冇晒線條，亦冇仙女下凡嘅感覺，最失敗係隻Sporty手錶同串頸鏈！」
梁靖琪自暴其短 3分
評語：「好肉酸！骨架粗大仲刻意露腿，自暴其短！Tee入面有深色衫，再加條頸巾，想做Layering，不過功力未到家！」
傅穎MK貨色 3分
評語：「劣質打扮！件衫一望就知係旺角貨色，加埋十年不變嘅金髮，唔Update！件衫有波希米亞風格，起死回生！」
Ricky Kwok打造潮人
郭慶彬（Ricky Kwok）從事時裝界多年，多擔任廣告形象指導，曾為樂基兒及熊黛林等設計造型，亦開設時裝店打造潮人，近來忙於籌備相展。
楊丞琳
Amanda S
衞蘭
Lou Doillon
江若琳
陳嘉寶
林莉
沈卓盈
梁靖琪
傅穎
Ricky Kwok