被踢爆溝奀星　呂晶晶遭亞視即Foul

亞姐冠軍呂晶晶與無綫姐仔唐詩詠近日均搭上無綫奀星黃嘉樂，令與晶晶「暗交」多時、身陷四角戀的亞視高層盛品儒深感愕然，緋聞更辣亞視！亞視除了即時把她飛出主持的旅遊節目《好味道系列》，改由戚黛黛頂上之外，連正斟洽的亞視經理人合約，至今仍未有任何進展，未知會否因此事而告吹！

「突然間話唔使去」

本報記者昨日聯絡上晶晶，對於被飛出主持節目，她說：「係突然間話唔使去，因為簽證問題，我係內地證，去韓國簽唔切！（緋聞影響，令公司叮走你？）唔會啩？公事還公事，感情還感情！（一早知要去，做咩唔早啲搞簽證？）時間搞錯咗！（可惜？）冇辦法，咪留喺香港拍劇囉！」亞視高層葉家寶則坦承臨時叮走晶晶，至於晶晶斟洽中的經理人合約亦告停頓，嘉寶則說：「公司想盡量栽培自己人！」

Toby撐好友冇景轟

另一邊廂，唐詩詠好姊妹梁靖琪（Toby），昨日於奧海城宣傳新劇《花花世界花家姐》，對於嘉樂與詩詠「翻撻」，Toby斷言冇可能：「肯定冇，因為嘉樂係詩詠阿哥！」