婷婷子怡褶得優雅

Ruffled（縐褶）Dress及Drip Dress今季依然深得女星歡心。星級形象指導Ricky Kwok表示Ruffles、Drips等細節好「蝦」人着，Carry到就有飄逸感覺，揀錯裙則會變得又肥又累贅，他大讚謝婷婷成功展現Drip Dress的簡約優雅感，乃最佳典範！

靚靚派：謝婷婷簡約輕盈

「條裙設計簡單，有Drip喺領位，着出嚟簡單優雅又輕盈，婷婷成功着出Drip Dress嘅Simple Elegant感覺！」

章子怡搶眼唔誇

「湖水藍嘅裙夠搶眼，雖然未至於有A級，不過好Buy佢化妝髮型同珠寶恰如其分，順眼唔誇張。」

過關派：鄭希怡累贅眼花

「佢本身勝在夠高，可惜揀錯裙款，個Pattern好娘，裙襬有Drip，但係Carry唔到輕盈感覺。」

楊秀惠高貴欠奉

「合格！但係條裙Cutting唔靚，款式Cheap Cheap哋，顏色亦唔太啱佢，條斜膊帶位置又怪，唔知想點！」

湯唯髮型出事

「麻麻哋！條裙唔夠後生，Total Look唔太靚亦都唔肉酸，係髮型超錯！仲有對鞋太Heavy，換對金色涼鞋好好多！」

失手派：李亞男臃腫古怪

「衰在揀錯裙，一層層Ruffles搞到下身好肥胖，Nude色同佢皮膚顏色太似顯得好怪，襯埋對銀色涼鞋更出事！」

江若琳輸蝕在矮

「紅色裙夠搶眼！但係下身Ruffles太多，佢唔夠高Carry唔到，着到PatPat位好肥，視覺效果唔靚。」

林莉老土嚇人

「化妝、髮型老餅，條裙手工麻麻仲要吊腳，好肉酸！好似唔啱身咁！佢裏面着咗Tube Top，顏色又唔Match，不如唔好着露多啲！」

星級形象指導Ricky

星級形象指導Ricky Kwok（郭慶彬）在時裝界打滾八年，多作廣告形象指導工作，曾為名模樂基兒、熊黛林擔任形象指導；另在銅鑼灣開設時裝店，主打日本及英倫時裝。