文：影視組
新一代網絡女神樂瞳與蔡嘉寶（Akina）昨日出席在海運大廈舉行的電腦遊戲活動，她們穿浴衣及人字拖亮相，吸引不少男Fans圍觀。原本大會安排二人派發紀念品，但由於男Fans眾多，怕引起混亂，故安排二人親吻紀念品，其後再由大會派給觀眾，令二人頗為尷尬。她們於活動上與Fans大玩遊戲，蔡嘉寶更餵Fans食雞蛋。
Akina拒肌膚之親
樂瞳表示近日工作量急增：「多咗工作，但冇計多咗幾多收入，我最開心係多咗曝光機會。（好搵過之前做歌手？）做歌手都多嘢做，都畀到我好大滿足感。（男友投訴冇時間拍拖？）我都冇男友，拍拖隨時都得，我依家享受工作。（公開送吻尷尬？）都幾尷尬，唔慣囉！我唔會立亂送吻，錫落紀念品度都唔衞生。（怕有人拎紀念品嚟錫，幻想同你咀？）人哋點做控制唔到。」
同場的Akina坦承有男友：「我有個拍拖一年多啲嘅男友，佢得閒都會陪我出活動。（佢唔介意你性感？）佢想我密實啲！但工作需要，扮錫都OK，肌膚之親盡量唔好。」
樂瞳穿浴衣出席活動，吸引不少男Fans圍觀。
樂瞳（左）與蔡嘉寶雖然感到尷尬，但仍親吻紀念品。
嬌俏的樂瞳（左）與蔡嘉寶拿着道具大刀，動作趣怪。
蔡嘉寶全情投入玩遊戲，餵男Fans食雞蛋。